Havaların isti keçməsi ilə əlaqədar olaraq ictimai nəqliyyat sistemində, xüsusən də əhalinin daha çox istifadə etdiyi yeraltı nəqliyyat növü olan metroda insanlar istidən əziyyət çəkirlər.
Məsələ ilə bağlı mətbuata açıqlama verən "Bakı Metropoliteni”nin mətbuat xidmətinin rəhbəri Nəsimi Paşayev isə hər dəfəsində "Bakı Metropoliteni”ndə soyutma sisteminin olmadığını deyib. Onun sözlərinə görə, istehsalçı tərəfindən bu qatarlarda kondisioner quraşdırılması nəzərdə tutulmayıb: "Metroda kondisioner sistemi yoxdur. Sonuncu dəfə alınan 3 qatarda kondisioner var. Onlar da işləyir. Başqa qatarlarda soyutma sistemi yoxdur.
"Bakı Metropoliteni” sərnişinlərin rahatlığı üçün əlindən gələni edir. Mənə qəribə gələn odur ki, ziyalılarımız olmayan bir şeyi necə müzakirə edirlər? Gələcəkdə bu qatarlar öz istismar dövrünü başa vurduqdan sonra onları əvəzləyəcək qatarlarda kondisioner sistemi olacaq”.
Nəsimi Paşayev qeyd edib ki, hazırda metrostansiyalarda havanın temperaturu mövcud hava şəraitindən çox yaxşıdır:
"Stansiyalarda sərin hava şəraiti var. Havalandırma sistemi, ventilyasiya var, hansı ki, onun vasitəsi ilə təmiz hava içəri vurulur. Amma metroda belə bir qayda var. Bayırda havanın temperaturu 35 dərəcəni keçərsə, o havanı içəri vurmaq olmaz. Bu, insanların həyatı üçün təhlükəlidir”.
Vətəndaşların Əmək Hüquqlarını Müdafiə Liqasının sədri Sahib Məmmədov da hesab edir ki, indiki şərtlərlə metroda kondisioner sisteminin quraşdırılması inandırıcı olmadığı üçün "Bakı Metropoliteni”nin rəsmisi yalan danışmaq istəməyib:
"Metroda xidmətin aşağı səviyyədə olması gediş qiymətlərinin aşağı olması ilə bağlıdır. Bununla əsla qiymətlərin qaldırılmasını təşviq etmirəm, çünki mövcud durumda qiymətlər əhalinin gəlirlərinə uyğundur. Amma danılmaz faktdır ki, ictimai nəqliyyat əhaliyə keyfiyyətli xidmət təklif etmək üçün gəlirlərini artırmalıdır. Düzdür, dövlət dotasiya ayırır, amma mövcud xərclər fonunda Metropoliten rəhbərliyi qatarları yeniləyib, ventilyasiya sistemini təkmilləşdirə bilmir”.
S.Məmmədovun sözlərinə görə, mövcud problemlərin həlli üçün xarici ölkələrin təcrübəsi tətbiq edilməlidir. Yəni əhalinin gəlirsiz təbəqələri istisna olmaqla digər vətəndaşlar üçün qiymətləri bahalaşdırmaq lazımdır:
"Tələbələr, təqaüdçülər və digər sosial qayğıya ehtiyacı olan şəxslər üçün qiymətlər 20 qəpik olaraq qalmalı, turistlər, ölkədə olan əcnəbilər üçün tarifləri artırmaq lazımdır. Belə çıxır ki, dövlət tərəfindən ayrılan ictimai nəqliyyatın saxlanılmasına verilən dotasiya xarici vətəndaşların ucuz qiymətə hərəkətinə sərf olunur. Bu da düzgün sistem deyil. Vahid kart sistemi imkan verir ki, ayrı-ayrı təbəqələr üzrə müvafiq qiymət mexanizmi tətbiq edilsin. Şəxsən mən cəmiyyətin aztəminatlı təbəqələrinə yerüstü və yeraltı nəqliyyatda gediş haqqına güzəştlərin edilməsi fonunda qiymətlərin artırılmasının tərəfdarıyam, xüsusən də əcnəbilər üçün. Ümumiyyətlə isə gediş haqqı prosesinin tənzimlənməsində müxəlif sistemlər mövcuddur. Bakı metropoliteni istənilən ölkənin təcrübəsindən yararlanıb bu problemi nizama sala bilər”.
Şəymən
