Milli Məclisdə keçirilən büdcə müzakirələri zamanı millət vəkili Jalə Əliyeva güzəştli ipoteka kreditləri məsələsinə toxunub.
Sherg.az xəbər verir ki, deputatın sözlərinə görə, bu kreditlər təkcə dövlət quluqçularına yox, həm də müəllimlərə, həkimlərə, mədəniyyət, incəsənət xadimlərinə, yaradıcılıqla məşğul olan şəxslərə verilməlidir:
"Bununla yanaşı düşünürəm ki, internat məktəblərində böyüyən gənclərin ev və işlə təmin olunması vacibdir. Həmçinin küçələrdə qalan uşaq və qadınlar üçün sığınacaqların tikilməsi, icbari tibbi sığorta üçün əlavə vəsaitin ayrılması məqsədəuyğundur.
"Mədəniyyət bir ölkənin pasportudur. Çünki bu bir çox sahələri özündə birləşdirir" - deyən J.Əliyeva qeyd edib ki, mədəniyyətə daha çox diqqət ayrılmalıdır:
"Büdcədən kino yaradıcılığına ayrılan vəsait yetərli deyil. Kino sahəsinə daha çox diqqət ayırılmalıdır. İstər bədii, istərsə də sənədli filmlər olsun, illər keçdikcə ölkəmizi tanıdan bir vasitəyə çevrilir. Ölkənin keçmişini, bu gününü və gələcəyini özündə birləşdirir. Dünya səviyyəli filmlərin çəkilməsi üçün büdcədən daha çox vəsaitin ayrılmasına ehtiyac var. Bununla yanaşı demək istəyirəm ki, hər məsələnin həllini dövlətdən də gözləmək olmaz. İş adamları və özəl şirkətlər bu məsələdə aktiv olmalıdırlar. Mədəniyyət nazirimiz komitə iclaslarında mədəniyyət sahəsində sponsorluq məsələsinə toxunub. Dövlət özəl sektora kifayət qədər gözəl şərait yaradır. Özəl müəssisələr də bu məsələlərdə dövlətə yardımçı olmalıdır. O zaman inkişaf olacaq”.
Anar
