"Sosial şəbəkələrdə mətbuat nümayəndələrinə, tanınmış şəxslərə qarşı hərəkətə keçən saxta profillərin, trolların arxasında bəzi qüvvələr dayanır”.
Bu barədə "Sherg.az”a son zamanlar sosial şəbəkələrdə trolların artmasının səbəblərin izah edərkən Azərbaycan Mətbuat Şurasının sədri, millət vəkili Əflatun Amaşov bildirib. O diqqətə çatdırıb ki, həmin saxta profillərin sahibləri sanki bir mərkəzdən idarə olunur:
"Bu cür trolların meydana çıxması təəccübləndirici deyil. Çünki Azərbaycan mətbuatı kifayət qədər inkişaf edib. 90-cı illərdən fərqli olaraq, hazırda Azərbaycana qarşı basqılar olanda, mediamız onlara cavab verməkdə çətinlik çəkmir. Üstəlik, Azərbaycanda keçirilən beynəlxalq tədbirlər, siyasi və dünya əhəmiyyətli iqtisadi layihələr informasiya məkanında ölkəmizə qarşı təxribatların artmasına səbəb olur. Kənardan olan basqılar artır, məmurlarımıza qarşı hətta təhqirlər baş qaldırır.
Düşünürlər ki, Azərbaycan Şərq ölkəsidir, burada asanlıqla təxribat törətmək, dinlər arasında iqtidar və vətəndaşlar arasında narazılıq yaratmaq olar. Azərbaycanı zəif görmək, ölkəmiz vasitəsilə niyyətlərinə çatmaq istəyən qüvvələr hətta bəzi məqamlarda Azərbaycanın konstitusion quruluşundan narazılıq ifadə edirlər. Səbəb isə odur ki, Azərbaycan varlı dövlətdir, nefti, qazı var. Ona görə, Azərbaycanın inkişafı ilə razılaşmayan, bizə qarşı çıxan qüvvələr də meydana gəlir. Bu qüvvələr ölkəmizi zəiflətməyə çalışırlar”.
Ə.Amaşov bu cür qüvvələrin mətbuat nümayəndələrini ayrı-ayrı təbəqəyə bölərək, narazılıq yaratmağa çalışdığını vurğulayıb:
"Məsələn, 22 iyul – Milli Mətbuat Günü ilə əlaqədar jurnalistləri təbrik edərkən "əsl jurnalistləri təbrik edirik”, "mətbuat pis gündədir” və s. ifadələr işlədənlər olur. Halbuki bu şəxslərin fikirləri əsassızdır. Azərbaycan jurnalistikası xüsusilə son illərdə çevikliyi, aktivliyi ilə seçilir. Düzdür, zaman dəyişir, yeni tələblər, müasir texnologiyalar yaranır. Yeni çağırışlara cavab vermək, texnoloji imkanları artırmaq məsələləri tamam ayrı məsələlərdir. Bu problemlər hər zaman olur və zamanla həllini tapır. Əslində, bu cür çətinliklər olmasa, inkişaf da olmaz. Amma bu cür problemlərə köklənib, bütün mətbuatı günahlandırmağa çalışmaq düzgün deyil. Sağlam tənqid olsa, qarşılıqlı dialoq şəklində müzakirələr aparılsa, daha çox inkişafa nail ola bilərik”.
Aysel Aslan
