Təhsil naziri Mikayıl Cabbarovun əmri ilə "Azərbaycan Respublikası Təhsil Nazirliyi sisteminə daxil olan ümumi təhsil müəssisələrində müəllimlərə tələbatın müəyyənləşdirilməsi, pedaqoji kadrların işə qəbulu və yerdəyişməsi Qaydaları”nda qismən dəyişiklik edilib.
Dəyişikliyə əsasən, müddətsiz əmək müqaviləsi ilə işləyən müəllimlər də könüllü şəkildə hazırkı iş yerindən çıxmadan müəllimlərin işə qəbulu müsabiqəsində iştirak edə bilər.
Qeyd edək ki, iyulun 1-dən Təhsil Nazirliyi sisteminə daxil olan ümumi təhsil müəssisələrinə müəllimlərin işə qəbulu üzrə elektron ərizələrin qeydiyyatına başlanılıb. Proses iyulun 14-dək davam edəcək.
Sözügedən dəyişikliyi dəyərləndirən təhsil eksperti Kamran Əsədov isə "Şərq”ə açıqlamasında, ümumiyyətlə, müəllimlərin yerdəyişməsi üçün imtahan verməsini doğru hesab etmədiyini deyib. Onun fikrincə, pedaqoqlar onsuz da Təhsil Nazirliyinin tabeçiliyindəki məktəblərdə fəaliyyət göstərirlər. Onların bir məktəbdən digər məktəbə yerdəyişməsi üçün yenidən imtahana cəlb olunmasının nə mənası var ki:
"Əgər hərbiçi xidməti ilə əlaqədar bir rayondan digər rayona gedirsə, o zaman onun həyat yoldaşı da haqlı olaraq ərinin xidmət edəcəyi yeni rayona getməlidir. Onu yenidən imtahana cəlb etmək müəllimlər üçün vaxt itkisindən başqa bir şey deyil.
Əgər hansısa müəllim əsaslı olaraq digər rayonun məktəbində çalışmaq istəyirsə, bunun obyektiv və subyektiv tərəfləri araşdırılmalıdır. Getmək istədiyi məktəbdə həmin fənni tədris etmək üçün dərs saatları mövcuddursa, yerdəyişmə aparılmalıdır”.
Şəymən
