"Gömrük rüsumunun artırılması iri mühərrikli avtomobillərin qiymətlərində artıma səbəb olacaq”.
Bu sözləri "Sherg.az”a gələn il avtomobillərin qiymətlərində gözlənilən bahalaşma ilə bağlı danışarkən iqtisadçı ekspert Vüqar Bayramov söyləyib.
Onun qənaətincə, ölkəyə gətirilən yeni avtomobillərin qiymətlərində artımlar gözlənilir:
"Adətən, gömrük rüsumları artırıldıqda bu, iri mühərrikli avtomobillərə aid edilir. Mühərriki nisbətən kiçik olan avtomobillərin qiymətlərində ciddi dəyişiklik olacağı gözlənilmir. Çünki həmin maşınlara yüksək rüsumlar tətbiq edilmir.
Bahalı avtomobillərin qiymətlərinin daha da artırılacağını proqnozlaşdırırıq. Nisbətən ucuz və mühərrik gücü zəif avtomobillərin qiymətləri isə gələn il sabit qalacaq”.
Qeyd edək ki, Nazirlər Kabinetinin 17 noyabr 2017-ci il tarixli qərarı ilə təsdiq edilən "Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri”nə əsasən Azərbaycana idxal edilən minik avtomobillərinə tətbiq edilən idxal gömrük rüsumu gələn il yanvarın 1-dən dəyişəcək.
Aysel Aslan
