Gürcüstan eks-prezidenti və Odessa vilayətinin keçmiş qubernatoru Mixeil Saakaşvilinin ekstradisiyası tələbi ilə Ukraynaya müraciət edib. Ukraynanın ədliyyə nazirinin müavini Sergey Petuxov da təsdiq edib ki, Ukrayna Saakaşvilinin axtarışa verilməsi, saxlanması və ekstradisiyası barədə müraciət alıb.
Xatırladaq ki, Ukrayna vətəndaşlığı ləğv edilən Saakaşvili hazırda ABŞ-da pedaqoji fəaliyyətlə məşğuldur. Onun Ukraynaya geri dönəcəyi gözlənilir.
Məsələ ilə bağlı "Şərq”ə açıqlama verən Qərb Universitetinin professoru, politoloq Fikrət Sadıqov çox mürəkkəb bir situasiyanın yarandığını bildirib.
Ekspertin sözlərinə görə, Ukrayna rəhbərliyi müxtəlif bəhanələrlə Saakaşvilinin vətəndaşlıq hüququnu əlindən alıb:
"Eks-qubernator öz prinsiplərinə sadiq qalaraq heç bir günahının olmadığını, hansısa qanun pozuntusuna yol vermədiyini deyir. Ona görə də Ukraynaya qayıdacağını, mübarizəyə davam edəcəyini iddia edir. Vurğulayım ki, hazırda Ukrayna-Gürcüstan münasibətləri yüksək səviyyədədir. Xüsusən, Ukrayna Prezidenti Poroşenkonun Gürcüstana səfərindən sonra iki dövlət arasında əlaqələr daha da inkişaf edib.
İkili münasibətlər imkan verir ki, Saakaşvili sözünə əməl edərək Ukraynaya qayıdacağı təqdirdə, sərhəddi keçən kimi ölkə qanunlarına əsasən pasportu əlindən alınsın və Gürcüstana təhvil verilsin. Yəni Saakaşvilinin Gürcüstana ekstradisiyası mümkündür. Çünki Ukraynaya daxil olan sabiq qubernatorun şəxsiyyətini təsdiq edən sənəddən məhrum edilməsi ona ciddi problemlər yaradacaq. Nəzərə almaq lazımdır ki, hər şeyin arxasında siyasi məqamlar dayanır. Siyasi məqamlar Ukrayna-Gürcüstan əlaqələri və Saakaşvili ilə Poroşenko arasında olan kəskin münasibətdir”.
İsmayıl
