NATO-nun Baş katibi Yens Stoltenberq Bakı-Tbilisi-Qars dəmir yolu xəttinin möhtəşəm layihə olduğunu bildirib. Baş katibin sözlərinə görə, ölkəmizin uğurlu layihələrindən olan Bakı-Tbilisi-Qars dəmir yolu Avropaya çıxış üçün olduqca vacibdir.
Y.StoltenberqBakı-Tbilisi-Qars dəmir yolunun NATO üzv dövlətləri tərəfindən Əfqanıstana və geriyə daşımalar zamanı istifadə olunduğunu qeyd edərək, bu dəmir yolunun Alyansın "Qətiyyətli Dəstək” missiyasının uğuruna mühüm töhfə verdiyini vurğulayıb.
Baş katibin açıqlamasını "Sherg.az”a dəyərləndirən millət vəkili Vahid Əhmədov Azərbaycanın NATO üçün çox əhəmiyyətli olduğunu qeyd edib.
Deputatın sözlərinə görə, ölkəmiz uzun müddətdir ki, NATO ilə əməkdaşlıq edir:
"Xüsusilə Əfqanstanda çoxlu sayda əsgər və zabitlərimiz var. Onlar mütəmadi olaraq əhalinin təhlükəsizliyini qorumaqla məşğuldurlar. NATO-nun əməkdaşlıq çərçivəsi imzalanmış protokollara və müqavilələrə uyğun aparılır.
Ona görə də baş katib bu yaxınlarda Bakı-Tbilisi-Qars dəmir yolunun istifadəyə verilməsi və bu dəmir yolu vasitəsilə müəyyən yüklərin daşınmasını diqqətə çəkdi. Bütün bunlar isə Azərbaycanın NATO üçün böyük əhəmiyyət kəsb etdiyini göstərir.
Doğurdan da son illər Azərbaycanda gedən islahatlar, bütün sahələrdə aparılan inkişaf ölkəmizin dünyada reytinqini yüksəldir. Azərbaycan hərbi sahədə də bir çox dövlətlərlə əlaqələr yaradır. Bütün bunlarla yanaşı NATO-nun baş katibinin Azərbaycanla əlaqədar yüksək səviyyədə söylədiyi fikirlər diqqətəlayiqdir.
Bu, ölkəmizin xarici siyasətinin önəmli məqamlarından biridir. Hələ xarici işlər naziri Elmar Məmmədyarovun görüşləri, söylədiyi fikrilər əyani sübutdur ki, Azərbaycan xarici əməkdaşlıqda və siyasətdə kifayət qədər öndə gedən dövlətlərdən biridir”.
Yeganə Bayramova
