Son vaxtlar elektron xəritələrdən, naviqatorlardan istifadə edən vətəndaşlar bu sistemdəki nöqsanlardan şikayətlənirlər. Xüsusilə, elektron xəritədən daha sıx yararlanan taksi sürücüləri
xəritədə göstərilən ünvanların düz gəlmədiyini, 100-500 metrə qədər yanlışların olduğunu iddia edirlər.
Bu problemin səbəblərini "Sherg.az”a izah edən İKT üzrə mütəxəssis Cahid İsmayıloğlu isə problemin həmin mobil tətbiqlərin özü ilə bağlı olduğunu söyləyib.
Mütəxəssis deyib ki, naviqatorların bir çoxlarının bazaları zəif və köhnə olur:
"Normal çalışan elektron xəritələrdən istifadə edilsə, vətəndaşlar bu problemlərlə nadir hallarda üzləşərlər. Naviqatorlardakı səhvlərin bir səbəbi də internetin keyfiyyəti ilə bağlı olur. Mobil internet zəif olduqda, fasilələr yarandıqda istifadəçinin işarələdiyi yerdə və ya hazırda dayandığı məkanda gecikmələr olur, təhriflər yer alır”.C.İsmayıloğlu əlavə edib ki, vətəndaşlar bir çox hallarda elektron xəritədən düzgün istifadəni bilmirlər:
"Taksi sürücüləri, taksi sifariş edən vətəndaşlar, xəritə istifadəçiləri dayandıqları yeri işarələmirlər. Məsləhət odur ki, dayandıqları məkanda rahat tapılan, xəritədə simvol ilə işarələnmiş yerləri seçsinlər. Məsələn, avtobus dayanacaqlarını, müxtəlif obyektlərin, tanınmış binaların qarşısını qeyd etsələr, qarşı tərəf rahatlıqla tapa bilər. Belə məkanlarda elektron xəritələr də nadir hallarda səhv edirlər”.
Aysel Aslan
