Yerli (rayon, şəhər) icra hakimiyyəti başçılarının iki səlahiyyəti ləğv edilib. Məlumata görə, bu, Azərbaycan Prezidenti İlham Əliyevin bu gün imzaladığı "Yerli icra hakimiyyətləri haqqında Əsasnamə”nin təsdiq edilməsi barədə” Azərbaycan Respublikası Prezidentinin 2012-ci il 6 iyun tarixli 648 nömrəli Fərmanında dəyişikliklər edilməsi haqqında” fərmanda əksini tapıb.
Fərmana əsasən, yerli icra hakimiyyəti başçılarının mədəni-maarif idarələrinin işini təşkil etmək və Mədəniyyət və Turizm Nazirliyi ilə razılaşdıraraq nazirliyin yerli bölmələrinin rəhbərlərini təyin etmək səlahiyyətləri ləğv olunub.
Yeniliyi müsbət dəyərləndirən "Bələdiyyələrin fəaliyyətinin təbliği” İctimai Birliyinin sədri Vüqar Tofiqli "Şərq”ə söyləyib ki, Prezidentin imzaladığı fərmanı müzakirəyə çıxarmaq olmaz: "Ölkə başçısı bu əlavə və dəyişiklikləri məqsədəuyğun hesab etdiyi üçün bunu ancaq müsbət saymaq olar. Cənab Prezident tərəfindən qəbul edilən məsələləri müzakirə etməyə ehtiyac yoxdur”.
Fərmanın mahiyyətindən söz açan ekspertin sözlərinə görə, mərkəzləşmiş qaydada mədəniyyətlə bağlı dövlət siyasətini Mədəniyyət və Turizm Nazirliyi (MTN) həyata keçirdiyinə görə, bu işi onun öhdəsinə həvalə etmək məqsədəuyğundur: "Bu hal həm nazirliyin məsuliyyətini artırar, həm də bu nazirlik öz kadrlarına məsuliyyət daşıyar. Əvvəllər həmin quruma kadrların seçilməsi üçün nazirliklə icra arasında ikitirəlik yaranırdı. Pərakəndəlik ola bilərdi. Amma indi konkret olaraq bu işlər MTN-ə həvalə olunur. Bu mənada atılan addımı zəruri hesab edirəm və müsbət dəyərləndirirəm”.
Ayyət Əhməd
