"Uşaqlarla, uşaq pulları ilə bağlı məsələ artıq həllini tapmalıdır. Başqa yerdə bu var və yoxdur, bunun bizim üçün elə bir əhəmiyyəti qalmır. Biz özümüz bu məsələni həll etməliyik. Həll etməliyik ki, uşaq xəstə olmasın, şikəst olmasın, əlil olmasın. Burada ünvanlılıq olmalıdır. Hökumət hətta, naturallıq yolu ilə də bunu edə bilər, yəni, qida, ərzaq şəklində də kömək etmək olar. 63 faizi əhalinin rəsmi gəliri yoxdur, həm atanın, həm də ananın. Ona görə də hökumət bu məsələni həll etməlidir”.
Sherg.az bildirir ki, bu sözləri gələn ilin dövlət büdcəsinin Milli Məclisdə müzakirəsi zamanı millət vəkili Fazil Mustafa səsləndirib. Deputat qeyd edib ki, bu problemi həll etmək elə də çətin deyil.
Bununla yanaşı millət vəkili paytaxtda yaşanan nəqliyyat xaosuna toxunub. F.Mustafa vurğulayıb ki, Bakının yol-nəqliyyat sistemində ciddi problemlər var:
"Mən hesab edirəm ki, nəqliyyat problemini aradan qaldırmaq üçün, Bakıda bir çox yeni metro stansiyaları tikilməlidir. Amma onu da deyim ki, metro stansiyalarına da əl gəzdirilməlidir. Bu gün milyonlarla insan metrodakı havasızlıqdan əziyyət çəkir. Gərək bir milyon insan havasızlıqdan boğulsun ki, bu sahəyə vəsait ayrılıb problem aradan qaldırılsın?".
Anar
