Ermənistanın baş naziri Paşinyan növbəti dəfə siyasi səviyyəsinin olmadığını nümayiş etdirdi. O, hakimiyyətə yiyələnmək üçün küçələrdə hansı ritorikadan istifadə edirdisə, baş nazir kimi də eyni ritorikadan faydalanmağa çalışır. Paşinyan sonuncu dəfə BMT Baş Assambleyasında çıxışı zamanı Dağlıq Qarabağın Azərbaycanın tərkibində ola bilməyəcəyini dilə gətirib. Birincisi, Dağlıq Qarabağ ermənilərdən ibarət deyil, orada azərbaycanlılar da yaşayırdı, lakin işğal nəticəsində onlar deportasiya edildilər. Nəzərə alaq ki, nəticənin müsbət və ya mənfi olmasından asılı olmayaraq, danışıqlar formatı beynəlxalq hüquq əsasında ATƏT çərçivəsində müəyyənləşdirilib.
Deməli, Paşinyan öz çıxışı ilə bütövlükdə beynəlxalq hüququ, diplomatiyanın qanunlarını, BMT-nin Nizamnaməsini heçə sayır. Bu cür yarıtmaz məntiqlə Paşinyan hansı əsasla "soyqırımdan” bəhs edir?! Ermənistan təcriddən yaxa qurtarmaq üçün heç bir səmərəli üsul müəyyənləşdirə bilmir. Bunun üçün də Paşinyan durmadan sağ-sola saldıraraq, sərsəm bəyanatlar səsləndirir.
Lakin tam təcrid vəziyyətində olan Ermənistanın mövcud reallığı dəyişdirə bilmək gücündə olmadığı hamıya məlumdur. Azərbaycan rəhbərliyinin müdrik, düşünülmüş və müstəqil siyasi addımları nəticəsində Ermənistanın təcavüzkar rejimləri son çırpınışlarını sərgiləyirlər. Əslində Ermənistan, nəinki hücum əməliyyatı aparmaq, heç mövcudluğunu belə qorumaq iqtidarında deyil. Paşinyanın addımları isə Ermənistanın siyasi, iqtisadi, sosial və hərbi iflasını sürətləndirir.
Ermənistan baş naziri Nikol Paşinyanın həqiqəti əks etdirməyən bəyanatlarını "Şərq”ə dəyərləndirən tanınmış politoloq Nəzakət Məmmədova birmənalı şəkildə deyib ki, dünya ictimaiyyəti və beynəlxalq dairələr Paşinyanın kim olduğunu yaxşı bilir. Ekspertin fikrincə, baş nazirin yalan və cəfəng bəyanatlarına artıq heç kəs aldanmır:
"Paşinyan BMT-nin yüksək tribunasından başqa cür danışa bilməzdi. Ona görə də ikiüzlülük edərək, dünya ictimaiyyətinin gözündə "demokratik lider” obrazını yaratmaq istəyir. O, situasiyaya uyğun bəyanatlar verir və bununla manevr etdiyini düşünür. Ancaq siyasət ilk növbədə əxlaq elmidir. Nə olursa-olsun, bir siyasətçi yüksək mənəviyyata sahib olmalıdır.
Makiavellist yanaşma orta əsrlərdə qalıb. Paşinyan artıq ciddi siyasətçi kimi qəbul olunmur. Bir siyasətçinin dediyi sözün hökmü, çəkisi olmalıdır. O halda rəhbərin sözü ciddi qəbul olunur. İndiki şəraitdə isə erməni baş nazirin dediklərini heç kəs ciddi qarşılamır. Hər halda onun verdiyi bəyanatlar populist, cəfəng mahiyyət daşıyır. Çünki dedikləri öz xalqını aldatmağa, dünya ictimaiyyətində çaşqınlıq yaratmağa yönəlib”.
Analitik vurğulayıb ki, Paşinyan öz imicini ciddiləşdirməyə çalışsa da, bu, alınmayacaq:
"O, hakimiyyətinin ilk dövründə siyasi naşılıqdan irəli gələrək, yaxud da ona verilən ziddiyyətli təlimatlar əsasında uyğunsuz bəyanatlar verdi və bu onun barəsində qeyri-ciddi şəxsiyyət təsəvvürü yaratdı. Paşinyana olan etimad sıfırdır. Baş nazirin bu mənfi imicdən qurtulması mümkün olmayacaq”.
İsmayıl
