"Bir neçə həftədir davam edən etiraz aksiyalarından sonra müxalifət lideri Nikol Paşinyan Ermənistanın baş naziri seçildi.
O, parlamentdə bəyan edib ki, Dağlıq Qarabağ münaqişəsinin həlli məqsədilə Azərbaycanla danışıqlara hazırdır".
Bunu "Sherg.az"a "Atlas" Araşdırmalar Mərkəzinin sədri, politoloq Elxan Şahinoğlu söyləyib. Ekspertin qənaətincə, N.Paşinyanı konstruktiv mövqeyə gətirməliyik:
"Bunun isə iki yolu var, sülh, əmin-amanlıq və ölkəsi üçün inkişaf arzulayırsa, keçmiş lideri Levon Ter-Petrosyan kimi münaqişənin "mərhələli həll planı”nı qəbul etməlidir. Yox əgər xələfləri kimi status-kvonun davamını istəyirsə, əvvəlkitək İrəvanda erməni gənclərinin qəbilərini qarşılamağa hazır olmalıdır. Seçim Paşinyanındır. Onun düşünməsi üçün bir neçə ay vaxtı var.
O ki qaldı, baş nazir Paşinyanın daxili siyasətdə atacağı addımlara onun geniş manevr imkanları yoxdur. Komandasını və proqramını ayaqüstü formalaşdırmalı, islahalatlar aparmaq və sosial durumu normallaşdırmaq üçün əlavə resurslar tapmalıdır ki, o da kasıb Ermənistanda yoxdur, ağası Rusiya isə daha müftə pul vermək istəmir. Paşinyan küçənin vasitəsilə hakimiyyətə gəldi, ölkəsini uçurumdan qurtarmasa elə həmin küçənin təzyiqi ilə də yola salınacaq".
Qeyd edək ki, bu gün N.Paşinyan Ermənistanın yeni baş naziri seçilib.
Modern.az Ermənistan KİV-nə istinadən xəbər verir ki, "Yelk”, "Tsarukyan” və "Daşnaksütyun” fraksiyalarının vahid namizədi kimi baş nazir postuna namizədliyi irəli sürülən Paşinyan 58 deputatın səsini alıb. Ona səs verənlər arasında Respublika partiyasının üzvləri də var.
Ayyət Əhməd
