Millət vəkili Çingiz Qənizadə Azərbaycanda polis müstəntiqlərinin sayının artırılmasını təklif edib.
Milli Məclisdə 2018-ci il büdcəsinin müzakirələri zamanı çıxış edən Çingiz Qənizadə ölkənin iri şəhərlərində polis orqanında müstəntiqlərin sayının az olduğuna diqqəti çəkərək, onların sayının artırılmasını təklif edib.
Onun sözlərinə görə, araşdırmalar nəticəsində bəlli olub ki, xüsusən də Bakı, Gəncə və Sumqayıt kimi iri şəhərlərdə hər bir polis müstəntiqinə 20-25 iş düşür ki, bu da normadan xeyli çoxdur: "Bu da müstəntiqin keyfiyyətli istintaq araşdırmasına imkan vermir. Ona görə də bu problemi aradan qaldırmaq üçün müstəntiqlərin sayını artırmaq lazımdır. Ən azından iri şəhərlərdə polis idarələrinə əlavə 3-4 polis müstəntiqi ştatı ayrılsın. Bunun üçün büdcədən əlavə vəsaitin ayrılmasına ehtiyac var”.
Bu təklifi müsbət qiymətləndirən vəkil Adəm Məmmədov müəyyən zaman çərçivəsində hakimlərin sayının 600-ə yaxın artırıldığını deyib. Cinayət işlərinin həddindən artıq çox olduğunu vurğulayan vəkilə görə, ötən illərlə müqayisədə 60-70 faizə yaxın artım var:
"Bakı şəhər istintaq şöbələrində isə bu cür hadisələrin sayı daha çoxdur. Əhali artımı və cinayət hadisələrinin sayının artması fonunda ştat sayında heç bir artım yoxdur. Bu mənada Çingiz Qənizadənin təklifini təqdirəlayiq hesab edirəm və dəstəkləyirəm.
Vəkilin sözlərinə görə, müstəntiqin icraatında işlərin çox olması səbəbindən onların qəbuluna düşmək, onlarla əlaqə yaratmaq mümkün olmur. Gördükləri işin obyektivliyindən əlavə keyfiyyəti də azalır”.
Şəymən
