Rusiyaya qarşı sanksiyaların uzadılması Avropanın özünə də ziyan edir.
Bunu Sherg.az-a Almaniya və Fransa rəhbərlərinin Ukrayna məsələsinə görə, Rusiyaya sanksiyaların müddətinin uzatmasına münasibət bildirərkən, politoloq Zərdüşt Əlizadə deyib.
O deyib ki, Avropa ölkələri bu addımı ABŞ-ın tapşırığı əsasında atıb:
"Rusiyada vətəni düşünən insan tapmaq çətindir. Ona görə də,dövlətin bu problemlərlə üzləşməsi yüksək vəzifəli şəxslərin məsuliyyətsizliyini artıracaq. Bu amillərin təsiri nəticəsində qlobal cəhətdən belə hakim mövqedə olan dövlətin gələcəyinin olacağını demək çətindir. Avropa Birliyinin dərin böhran içərisində olması isə hər dövlətin belə desək, ağzından bir avaz gəlir. F.Olland müasir Fransa tarixində ən uğursuz prezident kimi yadda qalıb. A.Merkel, əksinə, müqayisədə daha bacarıqlı və savadlı siyasi xadimdir. Lakin onun da siyasi düşüncələrində və addımlarında köhnə fikirlər təkrarlanır. Bunlara rəğmən, Qərb ictimaiyyətində siyasi hadisələrə hərtərəfli şəkildə istiqaməti müəyyənləşdirən dövlət ABŞ-dır.
Donald Tramp hakimiyyətə gəldikdən sonra onun hadisələr münasibətində müəyyən dəqiqlik özünü göstərir. Təsadüfi deyil ki, o, öz komandasına əsasən biznesmenləri, uğurlu insanları cəlb etməyə çalışır. Çünki iş adamlarının əsas qayəsi bazar və puldur. Bu səbəbdən, onlar Amerikaya xeyir gətirə biləcək işlərə imza atırlar. Bu addımların ideoloji və ictimai rəydə necə qarşılanması kimi cəhətlərə fikir vermirlər. Lazım olduqda, ABŞ Ukraynanın hakimiyyətinin səriştəsizliyi nəticəsində böhrana düşmüş dövləti vəziyyətdən çıxara biləcək. A. Merkelin yaxın zamanda vəzifədən gedəcəyini nəzərə alsaq, onun açıqlamalarının təsirinin yarıya endiyini deyə bilərik. F.Olland isə yarıtmaz siyasətçi olduğuna görə onun açıqlamalarını ciddiyə almaq məqsədəuyğun deyil”.
Qeyd edək ki, ötən gün xarici mətbuatda yayılan məlumata görə, Almaniya baş naziri Angela Merkel və Fransa prezidenti Fransua Olland Ukraynadakı vəziyyətlə əlaqədar Rusiyaya qarşı sanksiyaların müddətini uzadırlar.
Ayyət Əhməd
