Bakıda Milli Gimnastika Arenasından çox xoşum gəldi.
Bu barədə Trend-ə akrobatika gimnastikası üzrə Dünya Kubokunun qarışıq cütlük tərkibində Viktoriya Aksenova ilə birgə "qızıl" medalını qazanan Kirill Startsev deyib.
K.Startsev bildirib: "Bakıda Milli Gimnastika Arenasından çox xoşum gəldi, ilk dəfə belə böyük arenada çıxış edirik. Azarkeşlər gözəl dəstəkləyir".
Cütün finaldakı çıxışından danışan idmançı kiçik nöqsanların olduğunu qeyd etdi: "Kiçik nüanslar oldu, gələcəkdə onları düzəldərik, onların üzərində işləyəcəyik. Hər şey yaxşı idi, bizim hər şeydən xoşumuz gəldi. Əlbəttə, hər dəfə çıxışda həyəcan özünü göstərir".
Gimnast həmçinin Bakını gəzdiyini bildirib: "Şəhər çox gözəldir, insanlar qonaqpərvər, yeməklər isə dadlıdır".
Qeyd edək ki, bu gün Bakıda Milli Gimnastiak Arenasında Akrobatika gimnastikası üzrə Dünya Kubokunun finallarına start verilib.
17-18 noyabr Bakıda ilk dəfə olaraq akrobatika gimnastikası üzrə Dünya Kuboku keçirilir. Beynəlxalq turnirdə Belarus, İsrail, Qazaxıstan, Hindistan, Rusiya və Ukrayna komandaları təmsil olunur.
Ötən gündən Milli Gimnastika Arenasında başlayan yarışlarda 2003-cü il təvəllüdlü və daha böyük gimnastlar kişi cütlüyü, qadın cütlüyü, qarışıq cütlük, qadın qrupu və kişi qrupu tərkibində mübarizə aparırlar.
Gimnastikanın ən maraqlı və həyəcanlı növlərindən biri olan akrobatika gimnastikası üzrə Dünya Kubokunda Azərbaycan komandasının heyətində son Avropa çempionatının bürünc medalçıları, qarışıq cütlüklərimiz Abdulla Əl-Məşayxi – Ruhidil Qurbanlı və Ağasif Rəhimov – Nurcan Cabbarlı çıxış edirlər. Kişi cütlükləri proqramında isə Dünya Yaş Qrupu Yarışlarının (2016-cı il) gümüş medalçıları Seymur Cəfərov – Murad Əkpərov ən yaxşı yer uğrunda mübarizə aparırlar.
