Məktəbin idman meydançasını tikinti sahəsinə çevirənlər qanun qarşısında cavab verməlidirlər
Bakının Sabunçu rayonu, 94 saylı orta məktəbin idman meydançası hasarlanıb. Bununla bağlı görüntüləri hüquqşünas Aslan İsmayılov özünün feysbuk səhifəsində paylaşıb. Hüquqşünas görüntülərə istinad edərək bildirir ki, 94 saylı məktəbin ətrafında tikinti işlərinə hazırlıq gedir.
"Müvəqqəti narahatlığa görə üzr istəyirik” tablosu da qoyulub. Ancaq ətrafa nəzər salanda bəlli olur ki, burada müvəqqəti yox, əbədi narahatlıqdan söhbət gedir. Çünki bir vaxtlar məktəbin idman meydançası olmuş sahə də hasarlanmış əraziyə daxildir. Meydançanın giriş qapılarına böyük qıfıl vurulub, sahədə yaşıllığın məhv edildiyi, bununla da tikintiyə zəmin hazırlandığı aşkardır. Bununla məktəblilər idman meydançasında təlimlər keçməkdən, fiziki tərbiyə ilə məşğul olmaqdan məhrum qalıblar. A.İsmayılov iddia edir ki, hasarlanmanı Sabunçu Rayon İcra Hakimiyyəti həyata keçirir. Ərazidə çox güman ki, yaşayış kompleksi, hündürmərtəbəli binalar inşa ediləcək. Hüquqşünas xəbəri paylaşmaqla ölkə rəhbərliyinə də müraciət edir və tikintinin dayandırılmasını xahiş edir.
"Bələdiyyələrin Fəaliyyətinin Təbliği” İctimai Birliyinin sədri Vüqar Tofiqli isə "Şərq”ə açıqlamasında təhsil müəssisəsinin ərazisinin zəbt edilməsinin yolverilməz və qanunazidd olduğunu dedi:
- Cənab Prezident hər zaman öz çıxışlarında bu məsələləri sərt qoyur və bildirir ki, məktəblərin, bağçaların əraziləri kimsə tərəfindən zəbt edilə bilməz. Görünür, kimlərsə gizli iş aparmaq fikrinə düşüb, məktəbin ərazisini inşaat sahəsinə qatmaq istəyirlər. Görüntüdə əks olunan həqiqətən məktəbin idman meydançasıdırsa, deməli, məktəbin inzibati ərazisidir. Və deməli, Təhsil Nazirliyinin balansındadır. Oranın zəbt olunması və tədris müəssisəsinə aidiyyəti olmayan hər hansı tikintinin aparılması üçün gərək Təhsil Nazirliyi o ərazidən imtina etsin. Bu da o zaman mümkün ola bilər ki, bu imtina əsaslandırılsın. Çünki Təhsil Nazirliyinin balansında olan ərazi eyni zamanda dövlət mülkiyyətidir.
Dövlət mülkiyyətində olan torpaq sahəsinin yalnız dövlət ehtiyacları üçün alınması mümkündür. Hansısa tikinti şirkətinə, sahibkara inşaat aparılması üçün torpaq sahəsi Bakı şəhər İcra Hakimiyyəti tərəfindən ayrılır. Bu da bir neçə mərhələdən ibarət uzun bir prosesdir. Dövlət Əmlak Komitəsinin, Memarlıq və Şəhərsalma İdarəsinin razılığı olmalıdır və s. Bütün mərhələlər keçildikdən sonra BŞİH tikintiyə razılıq verir. Məktəb rəhbərliyinin nazirlikdən xəbərsiz ərazidən imtinası da qeyri-mümkündür. Məktəb rəhbərliyinin torpaqdan imtina sənədi imzalamaq hüququ yoxdur. Burada, sözsüz, qanunsuzluq var və bunun qarşısı alınmalıdır.
Məktəblilər niyə idman meydançasına buraxılmamalıdır? Azərbaycanın beynəlxalq idman yarışlarında son illər əldə etdiyi uğurlar göz qabağındadı. Biz çalışmalıyıq ki, yeniyetmə və gənclərimiz sağlam böyüsün, idman növləri inkişaf etsin. Məktəbin idman meydançasını tikinti sahəsinə çevirənlər qanun qarşısında cavab verməlidirlər.
Məlahət Rzayeva
