Ötən gün Bakı Atatürk liseyinin "Tarix Klubu”nda "Sovet işğalı mühacirət mətbuatında” mövzusuna həsr olunmuş tədbir keçirilib. Tədbiri Bakı Atatürk liseyinin tarix müəllimləri Elmar Həsənli, Müşfiq Əlizadə və Anar Əli təşkil ediblər.
"Sherg.az" xəbər verir ki, tədbirə dövrün tədqiqi ilə məşğul olan tarixçi-alimlər, araşdırmaçı jurnalistlər və liseyin tələbələri qatılıblar. Təşkilatçılar və qonaqlar belə bir imkanı yaratdığı üçün liseyin rəhbəri Hüseyin Dəmirələ təşəkkürlərini bildiriblər.
Tədbirə qatılan mətbuat tədqiqatçısı, tarix elmləri üzrə fəlsəfə doktoru, "Şərq” qəzetinin baş redaktoru Akif Aşırlı maraqlı məruzə ilə çıxış edib. Baş redaktor Azərbaycan Xalq Cümhuriyyətinin işğalından sonra yaranmış vəziyyətin, Vətənimizin bolşeviklər tərəfindən işğal edilməsinin mühacir mətbuatında geniş əks olunmasından danışıb. A.Aşırlı sovet işğalından sonra Azərbaycanın hüdudlarından kənarda formalaşan mühacirət mətbuatının olduqca əhəmiyyətli olduğunu bildirib.
