"Milli Məclisin deputatları arasında hamıdan çox xalqın yanında gördüyüm millət vəkilidir o. Daim Şəhid məzarlarının başı üstündə ürək ağrısı ilə dayanıb Şəhid analarını bağrına basan, Şəhid xanımlarına təsəlli verən, Şəhid balalarına qayğı göstərən, müharibə veteranlarına, müharibə əlillərinə səmimi bir diqqət və ehtiramla yanaşan, Azərbaycan əsgərinə öz qardaşı, öz övladı kimi baxan Qənirə PAŞAYEVA... Mən bu adın Azərbaycan insanına nə qədər doğma və əziz olduğuna heç vaxt şübhə ilə yanaşmamışam. Bilirəm ki, bu ad çoxlarının ürəyində ümid qığılcımı, inam təşnəsi, sevgi ünvanı kimi daim əziz tutulur. Onu da bilirəm ki, bu Tomris qeyrətli millət vəkilimizin heç kimin müdafiəsinə ehtiyacı yoxdur. Elə mənim özümün də..."
Sherg.az xəbər verir ki, bu barədə öz "Facebook" səhifəsində, tanınmış əməkdar jurnalist, ehtiyatda olan polkovnik - leytenant İbrahim Rüstəmli yazıb. O fikirlərinə sadəcə bir münasibət kimi yanaşmağı rica edib: "Qənirə xanımla dəfələrlə müxtəlif tədbirlərdə eyni auditoriyanı bölüşsək də, heç vaxt bir-birimizlə bir kəlmə belə kəsməmişik. Amma onun da məni yaxşı tanıdığına əminəm...
Səmimi sözümdü, son vaxtlar Qənirə xanım haqqında bəzilərinin yaydığı ürək bulandıran, böhtan xarakterli informasiyalar ölkə vətəndaşı kimi hövsələmi daraltdı. Bir xanımın dövlətimizin və xalqımızın gələcəyi naminə görə biləcəyindən də artıq işlərə imza atması, yorulmadan, usanmadan insanların qayğı və problemlərini dinləməsi və bu yolda əlindən gələni əsirgəməməsi, görəsən, kim(lər)in bostanına daş kimi düşüb, kim(lər)in sancısına səbəb olub!
Bu dünyada ən böyük qəhrəmanlıq insanları sevmək, insanlara inam, ümid, sevgi bağışlamaqdı. Qənirə xanımın millət vəkili kimi fəaliyyətində hər şeydən çox hiss etdiyim ən böyük misssiyasıdı bu. Ona görə də vətənpərvərliyinə, səmimiyyətinə, təəssübkeşliyinə həmişə böyük qibtə hissilə yanaşdığım çox hörmətli millət vəkilimizə çamur atanları qınayıram. Onlara "ayıb olsun" deyirəm.
Çünki bizə inam, ümid, sevgi bəxş edənləri bu gün qorumasaq, sabah həyatımızın bütün rəngləri qaraya boyanacaq. Amma o da var ki, başqalarının haqqını müdafiə edənin özünümüdafəyə ehtiyacı olmaz!.."
,
