AMEA-nın akademik Ziya Bünyadov adına Şərqşünaslıq İnstitutunun türk filologiyası şöbəsinin aparıcı elmi işçisi, filologiya üzrə fəlsəfə doktoru Sədaqət Qasımlının "Türkiyə ədəbiyyatında yeni hekayəçilik” kitabı çapdan çıxıb.
İnstitutdan AZƏRTAC-a bildirilib ki, kitabda Türkiyə ədəbiyyatında yeni hekayəçiliyin inkişaf mərhələlərindən və bu inkişafa böyük xidmətlər göstərən türk ədəbiyyatının görkəmli hekayəçilərinin həyat və yaradıcılığından söhbət açılır.
Nəşrdə yeni hekayəçiliyin təşəkkülü dövrü araşdırılır və Aziz Efendi yaradıcılığı nəzərdən keçirilir. Tənzimat ədəbiyyatına aid bölümdə Ahmet Mithat, Nabizade Nazım, Samipaşazade Sezai kimi ədiblərin yaradıcılığı izlənilir. Sərvəti-fünun ədəbiyyatından Halil Ziya Uşaklıgilin, milli ədəbiyyat dövründən Ömer Seyfettin və Rafik Halit Karayın hekayə yaradıcılığına nəzər salınır.
Cümhuriyyət dövründə yeni hekayəçiliyin inkişaf yolları əsərdə geniş təhlil edilir. Burada Mamduh Şevket Esendal, Sabahattin Ali, Ahmed Hamdi Tanpinar, Orxan Kamal, Əziz Nesin, Haldun Taner və başqalarının yaradıcılığı araşdırılır. 50-ci illərdən sonrakı hekayənin yeni ənənələrindən 6-cı bölümdə bəhs edilir. Burada yeni türk hekayəçiliyində kənd mövzusuna, Samim Kocagöz, Yaşar Kemal, Fakir Baykurtun yaradıcılığına, Bekir Yıldızın realist hekayələrinə diqqət edilir.
Kitabda sosial-psixoloji üslubda yazan hekayəçilərdən Sabahattin Kudret Aksal, Necati Cumalı, Zeyyat Selimoğlu və başqalarının əsərlərindən bəhs edilir.
"Bunalım ədəbiyyatı” bölümündə Vüsat Bener, Tahsin Yücel, Demir Özlü, Demirtaş Ceyhun və başqa hekayəçilərin II Dünya müharibəsinin törtədiyi acı nəticələrin və sənayeləşmənin təzyiqi ilə əlaqədar olan əsərləri təhlil olunur.
Sonuncu bölümdə 50-ci illərdən sonrakı yeni türk hekayəçiliyindəki qadın yazarların əsərləri araşdırılır. Burada Nezihe Meriç, Leyla Erbil, Sevgi Soysal, Afet İlqaz, Cevim Burak və başqa ədiblərin hekayə yaradıcılığı əhatə olunub.
