"Küçələrin maşınlar vasitəsilə süpürülməsi haqqında ideya Nazirlər Kabinetinə göndərilib”.
Bunu Sherg.az-a sürət həddinin yüksək olduğu yollarda yolun süpürülməsi işlərində mümkün qədər xüsusi süpürən-təmizləyən maşınlardan istifadəni izah edərkən nəqliyyat eksperti Ərşad Hüseynov deyib.
Ekspert çoxlarını düşündürən, "bu maşınların istifadəsi ilə küçələri süpürən xadimələr işsiz qala bilər" iddiaya da aydınlıq gətirib:
"Bununla əlaqədar narahatlığa əsas yoxdur. Nazirlər Kabineti təqdim olunan ideyanı dəstəkləyib, qanunvericilik aktına çevrilməsi ilə bağlı tapşırıqlar verib. Tapşırıqların icra olunmasında isə çətinlik yoxdur. Qanunvericilikdə yol infrastrukturunun təşkili, idarə olunması qaydalarında, təhlükəsizlik normalarında bununla bağlı açıq məsələlər var. Daha da təkmilləşdirilməklə həmin məsələlərə bir daha aydınlıq gətiriləcək. sonradan isə təşkilatı işlərə başlanaraq, texnikanın alınması, gətirilməsi, idarəsi və işlənməsi təmin ediləcək. Ona görə ideya səsləndi, işləyənlər çörəksiz qalacaq söhbəti yoxdur”.
Xüsusi maşınlarla küçələrin yuyulmasının magistral yollarda aparılacağını diqqətə çatdıran Ə. Hüseynov yaşayış binalarının ətraflarının və aralarının eyni qayda ilə təmizlənəcəyini söyləyib:
"Heç kim maşınlarla binaların arasına girib, təmizlik işləri aparası deyil. Ona görə işçilərin həmin ərazilərdə fəaliyyəti qalacaq. Bakı şəhərinin magistral əhəmiyyətli küçə və prospektlərində maşınlarla təmizlik işləri aparılarsa, bu bütün təmizlənən ərazilərin maksimum 20 faizini təşkil edir. Yerdə qalan 80 faizi isə yenə həmin nənələr, xalalar, dayılar təmizləyəcək”.
Qeyd edək ki, Bakı Nəqliyyat Agentliyi küçələrin təmizlənməsi zamanı təhlükəsizliyə riayət edilməsi barədə 15.11.2016-cı il tarixində Nazirlər Kabinetinə bir sıra təkliflə müraciət edib. Dəyişikliklərdə təhlükəsizliyin təmin edilməsi məqsədilə sürət həddinin yüksək olduğu yollarda yolun süpürülməsi işlərində mümkün qədər xüsusi süpürən-təmizləyən maşınlardan istifadə edilməsinə dair məsələlər öz əksini tapıb.
Aysel Aslan
