Gürcüstanın Baş naziri İrakli Qaribaşvili noyabrın 24-də Azərbaycan Respublikasına işgüzar səfərə gəlib.
APA xəbər verir ki, hər iki ölkənin Dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülmüşdü.
Baş nazir İrakli Qaribaşvilini hava limanında Azərbaycan Respublikası Baş nazirinin birinci müavini Yaqub Eyyubov, xarici işlər nazirinin müavini Elnur Məmmədov və digər rəsmi şəxslər qarşıladılar.
10:27
Gürcüstan Baş naziri İrakli Qaribaşvili Bakıya səfərə yola düşüb.
APA-nın Tbilisi müxbiri xəbər verir ki, məlumatı Gürcüstan hökumətinin mətbuat xidməti yayıb.
Bildirilib ki, hökumət başçısı Azərbaycan Prezidenti İlham Əliyevin dəvəti ilə Bakıya səfərə gedib.
Məlumata görə, İrakli Qaribaşvili səfər çərçivəsində SPECA-nın 25-ci ildönümünə həsr edilmiş Zirvə görüşündə fəxri qonaq qismində iştirak edəcək, həmçinin hökumət başçılarının iştirakı ilə keçiriləcək paneldə çıxış edəcək.
İrakli Qaribaşvilinin həmçinin, Prezident İlham Əliyevlə görüşəcəyi qeyd olunub.
