Ermənistanın son günlərdəki təxribatçı fəaliyyətləri, regionda gərginliyi daha da artırmağa xidmət edir. Xüsusilə, Ermənistan-Azərbaycan sərhədində Ermənistanın artan təxribatları, bir daha riyakar və qeyri-konstruktiv davranışlarını ortaya qoyur. Rəsmi İrəvan atıcı silahlarla Azərbaycan ordusunun mövqelərini atəşə tutan erməni terrorçularının əməllərini ört-basdır etməyə çalışır. Lakin son dövrlərdə pilotsuz uçuş aparatları ilə həyata keçirilən kəşfiyyat xarakterli uçuşlar, Ermənistanın əsl niyyətini üzə çıxarır.
Mövzu ilə bağlı hərbi ekspert Azər Bayramov Sherg.az-a açılamasında Ermənistanın artan təxribatlarından və bunun səbəblərindən söz açıb:
"Ermənistan hər zaman olduğu kimi yenə də öz riyakar fəaliyyətini davam etdirməkdədir. Son günlərdə Ermənistan-Azərbaycan sərhədində Ermənistanın təxribatlarının daha da intensivləşdiyini müşahidə edirik. Bundan öncə atıcı silahlarla Azərbaycan ordusunun mövqelərini erməni terrorçularl atəşə tutmuşdular və bununla bağlı onların hərbi-siyasi rəhbərliyinin verdiyi absurd açıqlamalar heç bir həqiqəti əks etdirmirdi. Bunun məsuliyyətini öz üzərlərindən atmağa çalışırdılar. Lakin son günlərdə Ermənistanın pilotsuz uçuş aparatları ilə Azərbaycan ordusunun mövqeləri üzərində kəşfiyyat xarakterli uçuşlar həyata keçirməsi onların əsl niyyətini aşkara çıxarır.
Bu pilotsuz uçuş aparatları, xüsusən də Ermənistan-Azərbaycan sərhədində və təmas xəttində yerləşən bölmələr tərəfindən istifadə edilir. Bu bölmələrdən bir çoxu Yerkrapa kimi terrorçu qruplaşmaların tərkibinə daxildir. Onların balansında belə pilotsuz uçuş aparatlarının olması real deyil. Bu da onu göstərir ki, Ermənistanın dron qrupları Azərbaycanla sərhəddə təxribatlar törədirlər. Beləliklə, bu təxribatların birbaşa Ermənistanın müdafiə nazirliyi və hərbi-siyasi rəhbərliyi tərəfindən həyata keçirildiyini demək mümkündür".
Ekspert rəsmi İrəvanın bu cür davranışlarının Ermənistana heç bir yaxşı nəticə verməyəcəyini söyləyib:
"Ermənistan ordusunun bu pilotsuz uçuş aparatları Azərbaycan ordusunun arsenalındakı müxtəlif vasitələrlə asanlıqla neytrallaşdırıla bilər. Baş verən təxribatlar da bunun nəticəsini artıq göstərməkdədir. Ermənistan dildə sülhdən danışsa da, əməldə revanşizmə meyl edir. II Qarabağ müharibəsindən sonra, rəsmi İrəvan artıq milyardlarla dollar silahlanmaya sərf edib və ordusunda islahatlar həyata keçirməyə çalışır. Bu prosesdə ona dəstək verən havadarlarının əməlləri də sülhə deyil, müharibəyə meyl etdiklərini göstərir.
Azərbaycan, həmişə olduğu kimi, məsələlərin danışıqlar yolu ilə həll olunmasını dəstəkləyir. Lakin təəssüf ki, Ermənistan bu yanaşmaya qarşı təxribatlarla cavab verir".
Müsahibimiz Ermənistanın təxribatlara əl ataraq regionda vəziyyəti daha da gərginləşdirməyə çalışdığını bildirib:
"Azərbaycan hələlik bu təxribatlara səbirlə yanaşır, amma əgər Ermənistan belə ritorikaya davam edərsə, mütləq zəruri cavab tədbirləri həyata keçiriləcək. Bunun məsuliyyəti yalnız rəsmi İrəvanın və onun havadarlarının hərbi-siyasi rəhbərliyinin üzərinə düşəcək".
