“İşğaldan azad olunan yerlərə hələki getmək olmaz”
“Amma hərə bir yolla, kimisi nüfuzundan, kimisi tanışlıqdan istifadə edib gedir”
“Bu məsələ haqqında təcili qərar verilməlidir”
Azərbaycan vətəndaşları Hacıyev Şakir Məhərrəm oğlu, Hacıyev Firudin Məhərrəm oğlu, Hüseynov Zülfüqar Adışirin oğlu və Adilzadə Zibeydə Şakir qızı Füzuli rayonunun işğaldan azad olunmuş Aşağı Seyidəhmədli kəndi ərazisində ilkin ehtimala görə tank əleyhinə minaya düşərək həlak olublar. Onlar 90-BL-558 dövlət qeydiyyat nişanlı "Toyota" markalı avtomobillə hərəkətdə olarkən məlum hadisə baş verib.
Bu məşum olayın ardından Baş Prokurorluq və Daxili İşlər Nazirliyindən xalqa xəbərdarlıq olunub. Bildirilib ki, əhalinin təhlükənin mövcudluğunu nəzərə alıb, icazəsiz, işğaldan azad edilən ərazilər minalardan və digər partlayıcı vasitələrdən tam təmizlənənədək həmin bölgələrə getməmələri xahiş olunur.
Sözügedən məsələni “Sherg.az”a dəyərləndirən Qarabağ Azadlıq Təşkilatının sədri Akif Nağı deyib ki, insanlar illərdir görmədikləri yurdlarına getmək üçün səbirsizlənirlər:
“Yaxınlarının qəbirlərini ziyarət etmək istəyirlər. Bu təbii hisdir. Hesab edirəm ki, məsələ dövlət səviyyəsində nizamlanmalıdır. Düzgün rejim müəyyənləşdirilməlidir.
Sistem təyin olunmadığına görə belə faciələr baş verir. Deyirlər, qadağa var, olmaz. Amma hərə bir yolla, kimisi nüfuzundan, kimisi tanışlıqdan istifadə edib, gedir.
İşğaldan azad edilən ərazilərə tanınmış adamlar, yaxud da başqa sahənin nümayəndələri keçib, gedirlər. O da digərlərini qıcıqlandırır. İstəyirlər ki, hansısa yolla onlar da getsin. Ona görə bu faciələrin baş verməsində işğaldan azad olunan ərazilərdə yaradılacaq sistemə xidmət edən qurum məsuliyyət daşıyır.
Onlar heç kimə imkan verməməlidir. Digər tərəfdən vətəndaşın da üzərinə məsuliyyət düşür. 30 il gözlədik, indi tələsmək olmaz. İnsanların da günahı var, öz həyatlarını riskə atırlar. Bu məsələ haqqında təcili qərar verilməlidir”.
