Ukraynaya silah tədarükü artacaq
ABŞ Prezidenti Donald Trampla Rusiya lideri Vladimir Putin arasında növbəti telefon danışığı oldu. Telefon danışığı təxminən bir saat çəkib. Donald Tramp növbəti dəfə Ukraynada hərbi əməliyyatların tezliklə dayandırılması məsələsini qaldırıb. Putin Trampla söhbətində Moskvanın Kiyevlə danışıqları davam etdirməyə hazır olduğunu qeyd edib. Eyni zamanda Rusiya lideri vurğulayıb ki, Moskva böhranın əsas səbəblərini aradan qaldırmağa çalışacaq və məqsədlərindən geri çəkilməyəcək. Tramp danışıq sonrası deyib ki, Putinin Ukraynadakı müharibəni bitirmək niyyətində olduğunu düşünmür və bu, çox pisdir. Rusiya və ABŞ liderləri şəxsi görüşün mümkünlüyünü müzakirə etməyiblər.
Politoloq Məhəmməd Əsədullazadə Sherg.az-a deyib ki, Tramp-Putin arasında telefon diplomatiyası fiaskoya uğradı. Ekspert bildirib ki, telefon danışığında növbəti dəfə Ukrayna ilə bağlı razılıq əldə edilmədi:
"Halbuki, ABŞ prezidenti Rusiya ilə razılığa gəlmək və vasitəçi olmağa çalışırdı. Tramp Putinə zəng etməzdən iki gün əvvəl Ukraynaya hərbi yardımları dayandırdığını elan etmişdi. Bununla Tramp Putini atəşkəsə razı salacağına ümid edirdi. Amma Rusiya prezidenti öz mövqeyində qalaraq, ümumi sözlərlə Trampı "yola vermiş" oldu. Telefon danışığında Putin Trampın atəşkəs şərti ilə razılaşsaydı, Ukraynaya silah tədarükü qadağası qüvvədə qalacaqdı. Putin Ukraynada "ilkin məqsədlərinə" nail olanadək hərbi əməliyyatları davam etdirəcəyini Trampın diqqətinə çatdırıb. Putinin məqsədi Ukraynanı tam nəzarətə altına almaq, burada yeni hakimiyyət formalaşdırmaq və NATO-nu Şərqi Avropadan çıxarmaqdır. Rusiya Moldova və Şərqi Avropanı da nəzarətinə almağı hədəfləyir".
Analitik deyib ki, Tramp Putinlə telefon danışığından razı qalmadığını və Ukraynaya hərbi yardımları dayandırmadığını elan etdi:
"Hətta hərbi yardımları artıracağını vurğuladı. ABŞ və Avropa dövlətlərinin Ukraynaya silah tədarükünü artırması gözlənilir. Tramp ilin sonunadək Ukrayna ilə bağlı müəyyən irəliləyişə nail olmağı hədəfləyir".
