“65 yaş həkimlər dərhal pensiyaya getməməlidir. Təcrübəli kadrların bölgələrdə qalması mühümdür”
Hazırda həm dünyada, həm də Azərbaycanda həkim çatışmazlığı ciddi problem olaraq qalır. Tibbi Ərazi Bölmələrini İdarəetmə Birliyinin (TƏBİB) İcraçı direktoru Vüqar Qurbanovun sözlərinə görə, əksər rayonlarda bu çatışmazlıq müşahidə olunur. O bildirib ki, bu, təkcə Azərbaycanda deyil, demək olar, bütün dünyada mövcud olan problemdir.
Qurbanovun qeyd etdiyinə görə, həkimlərin yetişdirilməsi uzunmüddətli prosesdir və bu səbəbdən regionlarda çətinlik daha çox hiss olunur. Problemin həlli məqsədilə “Mental Klinika” layihəsi həyata keçirilir və ilin sonuna qədər bütün ixtisaslar üzrə bölgələrdə həkim təminatının tam bərpası planlaşdırılır.
Professor Adil Qeybulla Sherg.az-a hazırda bütün dünyada müşahidə olunan həkim çatışmazlığının səbəbinin bu sənətin çətinliyi, peşəyə qoyulan yüksək tələblər və bunun müqabilində göstərilən əməyin yetərincə maddi qarşılığının olmaması ilə bağlı olduğunu bildirib:
"Bunu açıq şəkildə etiraf etmək lazımdır. Məsələn, Almaniya və İngiltərə kimi inkişaf etmiş ölkələrdə də vəziyyət belədir. Bu səbəbdən də həmin ölkələr xaricdən həkim dəvət etməyə məcbur olurlar.
Səhiyyə xərcləri olduqca yüksəkdir və ölkələr bu xərcləri qarşılasa da, həkimlər çox vaxt bu şərtlərdən tam razı qalmırlar. Ümumiyyətlə, bütün ixtisaslar üzrə, istər şəhərlərdə, istərsə də kənd və regionlarda həkim təminatı ciddi problemdir. Buna görə də region prinsipi üzrə işin təşkili vacibdir.
Məsələn, Sovet dövründə kəndlərdə ambulatoriyalar, rayonlarda isə müalicə-diaqnostika mərkəzləri fəaliyyət göstərirdi. Bu təcrübədən istifadə edərək bütün mövcud imkanları səfərbər etmək, həkimlərin bölgələrdə işləməsi üçün maksimum şərait yaratmaq və onları bu işdə maraqlı edəcək stimullaşdırıcı tədbirlər görmək lazımdır.
Həmçinin, 65 yaşı tamam olan həkimləri dərhal pensiyaya göndərmək əvəzinə, əgər onların istəyi varsa, yaxın regionlarda fəaliyyətlərini davam etdirmələrinə şərait yaratmaq məqsədəuyğundur".
Professor söyləyib ki, mövcud resursların maksimum dərəcədə səfərbər edilməlidir:
"Düşünmürəm ki, bu problem ilin sonuna qədər tam həll olunsun, lakin bu istiqamətdə ardıcıl çalışmaq vacibdir. Həkim çatışmazlığı məsələsi daim aktual qalacaq, buna görə də əsas məqsədimiz mövcud resursları qoruyub saxlamaq və onların səmərəli istifadəsini təmin etmək olmalıdır".
