Hadisələrin inkişafı bunun reallaşmasına doğru yönəldilir
"Rusiya sülhməramlı kontingentinin rəhbəri general Volkovun “Laçın dəhlizinin girişinə mini gömrük postu quraşdırılacaq” açıqlaması Azərbaycanın dəhlizə post quraşdırması demək deyil, postu ruslar qurur, lakin Bakının tələbi ilə..". Bu barədə siyasi şərhçi Asif Nərimanlı deyib. Ekspert bildirib ki, mümkündür ki, Bakı dəhlizdən qanunsuz daşımaların qarşısının alınması tələbini sülhməramlıların qarşısında qaldıranda onlar Volkovun məlum müsahibəsində dediyi kimi “texniki imkanlarımız yoxdur” bəhanəsini irəli sürürmüş: "Bundan çıxış yolu kimi Bakının tələbi və istəyi ilə rusların nəzarət edəcəyi mini gömrük postun qurulması razılığı əldə olunub. Bu razılaşmanın olması qanunsuz daşımaların qarşısının alınması demək deyil, ruslar bundan “nəticə əldə olunması” kimi istifadə edirlər. Hərçənd, dəhlizdə hələki post qura bilməyən Azərbaycanın bunu rusların əli ilə etməsi hadisələrin inkişafına təsir edə bilər. Bundan sonra rusların qanunsuz daşınmalar faktı qarşısında “texniki imkanlarımız zəifdir” bəhanəsi işləməyəcək. Digər yandan növbəti qanunsuz daşınma faktından sonra dəhlizdə Bakının öz postunu qurması zərurəti daha çox aktual olacaq. O zaman rusların bəhanə gətirmə şansı indiki qədər güclü olmayacaq. Proseslərdən belə nəticə çıxır. Azərbaycan Laçın dəhlizinə nəzarət-keçid postu qurmaq planında israrlıdır və hadisələrin inkişafı bunun reallaşmasına doğru yönəldilir".
