Metrostansiyaların sayını 100-ə çatdırmaq lazımdır
“Hörmətli həmkarımız Fazil Mustafaya qarşı terror aksiyası təşkil edən, xarici dövlətlərlə, xüsusilə də İran xüsusi xidmət orqanları ilə işbirliyində olan cinayətkar dəstənin üzvləri ifşa olundu. Daxili İşlər Nazirliyinin əməkdaşları yüksək peşəkarlıqla bu cinayətin üstünü qısa müddətdə açdılar”.
Bunu millət vəkili Qüdrət Həsənquliyev deyib. Deputat bildirib ki, Bakı şəhərində təhlükəsizlik kameralarıın sayının artırılmasına çox ciddi ehtiyac var. Parlament üzvü rəqəmlərə istinad edərək bildirib ki, 9 milyon insanın yaşadığı Londonda 442 min 562 təhlükəsizlik kameraları quraşdırılıb. Bu hər 10 nəfərə bir təhlükəsizlik kamerası deməkdir: "Fiziki və hüquqi şəxslər tərəfindən quraşdırılan təhlükəsizlik kameraları, yəni ictimai təhlükəsizlik kameraları da nəzərə alınarsa, Londonda 4 milyon 441 min təhlükəsizlik kamerası var.
Bu isə o deməkdir ki, Londonda hər iki nəfərə, təqribən bir təhlükəsizlik kamerası düşür.
Bunu ona görə söyləyirəm ki, təhlükəsizlik kameraları cinayətkarların ifşa olunmasında böyük rol oynayır. Həm də onun çox böyük xəbərdaredici əhəmiyyəti var.
İnsanları cinayət törətməkdən çəkindirir. Mən vaxtilə Şəhərsalma və Tikinti Məcəlləsi qəbul olunanda da dedim ki, bütün yaşayış binalarında təhlükəsizlik kameralarının quraşdırılmasını həmin tikinti şirkətlərinin öz ixtiyarına buraxmaq lazımdır".
Q.Həsənquliyev nəqliyyatdakı problemlərdən də söz açıb:
"Bakı şəhərində çox ciddi sıxlıq var. Hesab edirəm ki, xüsusi dövlət proqramı qəbul olunmalıdır. Ən əzı 5 il ərzində Bakıda metrostansiyalarının sayını 100-ə çatdırmaq lazımdır. Bunun üçün həm Dövlət Neft Fondundan vəsait ayırmaq, həm də xarici şirkətləri və investorları bu işə cəlb etmək olar”.
