Turistlərin 77 faizi yalnız Bakıda gecələyib
Regionlarda bu sahə inkişaf etmir, qiymətlər yüksək, keyfiyyət aşağıdır
2025-ci ilin ilk rübündə hotel və mehmanxana tipli obyektlərdə turistlərin gecələmə sayı 484.9 min olub. Turistlərin üstünlük verdiyi hotellərin 77,5 faizi Bakıdakı mehmanxanalarda qeydə alınıb. Göründüyü kimi xaricilər Azərbaycanın digər bölgələrinə yox, əsasən Bakıya üstünlük verirlər. Yəni ölkəyə gələn hər 100 turistin 77-si paytaxtdan kənara səfər etmir. Ekspertlərin sözlərinə görə, bu data həm də regionlarda turizmin strateji inkişafı istiqamətləri baxımdan da siqnallar verir.
Millət vəkili Vüqar Bayramov "Sherg.az"a deyib ki, xaricilərin ikinci ən çox üstünlük verdiyi yaşayış məntəqəsi Qusar rayonudur. Deputatın sözlərinə görə, bu da birbaşa həmin bölgəmizdə qış turizminin inkişafı ilə bağlıdır:
"Xaricilər üçün ilk üçlüyü Naftalan tamamlayır. Bu də həmin şəhərimizdə sağlamlıq turizminin təmərkəzlüşməsi ilə bağlıdır. Deməli, regionlarda ənənəvi mövsümi turizm ilə yanaşı və əslində, daha çox yeni turizm məhsullarına ehtiyac var. Turistlər üçün cəlbedici olan qış, sağlamlıq turizmi ilə yanaşı, tarixi, dini və mədəni turizmin də inkişafı vacibdir. Bütün bunlar ilə yanaşı, bölgələrimiz xarici turist cəlb etməkdə paytaxt hotellərinə yenə də uduzurlar. Paytaxtın infrastrukturunu nəzərə aldıqda, bu, normal qarşılana bilsə də, regional gecələmə sayında fərqin böyük olması diqqəti çəkir. Təəssüf ki, hələ də bölgələr turizm potensialını tam təqdim edə bilmirlər və bu da xarici turist cəlbində çətinlik yaradır. Digər tərəfdən, əksər rayonlarda turizm xidmətlərinin qiyməti yüksək olaraq qalmaqdadır. Keyfiyyət isə hələ də standartlardan geri qalır".
