Azərbaycanla Ermənistan arasında itkin düşmüş şəxslərin axtarışı üzrə birgə fəaliyyət aparılması barədə ilkin razılıq əldə olunub.
Teleqraf xəbər verir ki, bu barədə Ermənistanın Milli Təhlükəsizlik Xidmətinin (MTX) direktoru Armen Abazyan bildirib.
“İtkin düşmüş şəxslərin taleyi və mümkün axtarış əməliyyatları müzakirə edilib. Bu əməliyyatların davamlı olması üçün ilkin razılıq əldə olunub. Görüşün nəticələrini müsbət qiymətləndirirəm. Nəticələrin əldə olunmasında maraqlıyıq. Nəticə sabah, beş gün, bir ay və ya bir il sonra olacaqmı? Bunu dəqiq deyə bilmərəm. Amma nəticəyə nail olmaq üçün əlimizdən gələni edirik”, - qurum rəhbəri deyib.
Axtarış əməliyyatlarının Qarabağ və ya harada aparılacağı ilə bağlı suala Abazyan geniş şərh verməyib, birgə əməliyyat-axtarış tədbirləri ilə bağlı razılıq əldə olunduğunu bir daha təkrarlayıb.
Xatırladaq ki, iyunun 4-də Azərbaycanın və Ermənistanın itkin düşmüş şəxslər üzrə dövlət komissiyalarının nümayəndələri arasında növbəti görüş keçirilib. Görüş çərçivəsində tərəflər münaqişə zamanı itkin düşmüş şəxslərin taleyinin aydınlaşdırılması ilə bağlı humanitar məsələləri müzakirə ediblər.
Görüşdə məlumat mübadiləsi imkanları, axtarış tədbirlərinin əlaqələndirilməsi məsələləri nəzərdən keçirilib. Tərəflər humanitar sahədə dialoqun davam etdirilməsinin vacibliyini vurğulayıb və itkin düşmüş şəxslərin ailələrinin maraqları naminə gələcək təmaslara hazır olduqlarını bildiriblər.
