Ümumi (9 illik) orta təhsil səviyyəsi üzrə 2025-ci il aprelin 27-də keçirilən buraxılış imtahanının nəticələrinə əsasən, Qax rayonundan olan Qızyetər Babayeva maksimum nəticə göstərib. Bakupost.az xəbər verir ki, o müsahibəsində əvvəlcədən bu balı toplayacağına əmin olduğunu bildirib: "Şəxsi telefonum yoxdur. Düşünürəm ki, bu, öz istəklərimizə nail olmağımıza mane ola bilər. Arzum isə həkim olmaqdır".
Sosioloq Mətanət Məmmədova “Sherg.az”a bildirib ki, müasir dövrdə təkcə yeniyetmə və gənclər deyil, yaşlı nəslin nümayəndələri də mobil telefondan həddindən artıq istifadə etməyə meyillidirlər ki, bu da onların digər həyati məsələlərdən uzaq düşməsinə səbəb olur:
“Doqquzuncu sinif şagirdinin bu məsələyə dair fikirlər bildirməsi və 300 bal toplaması müsbət haldır. Lakin qeyd etmək lazımdır ki, ölkəmizdə doqquzuncu sinifdə təhsil alan yüzlərlə şagird mövcuddur və onların arasında da yüksək nəticə göstərənlər az deyil. Bu baxımdan, mobil telefonun mövcudluğu yüksək nəticə əldə etməyə maneə yaratmır və gənclərin gələcək arzularının reallaşmasına əngəl olmur. Əksinə, telefondan düzgün və məqsədyönlü istifadə şagirdlərin bilik və informasiya əldə etmə prosesini sürətləndirir, bu da yüksək nəticə əldə etməyə zəmin yaradır. Lakin ondan səmərəsiz və nəzarətsiz istifadə hallarında tədris göstəricilərinin kəskin şəkildə aşağı düşməsi mümkündür. Belə hallarda nəinki 300 bal toplamaq, hətta minimal nəticə göstərmək belə çətinləşə bilər. Bütün yaş qruplarının texnologiyadan geniş istifadə etdiyi müasir cəmiyyətdə telefon sahibi olmaqdan imtina halları istər-istəməz psixoloji durumla bağlı suallar doğurur. Bu cür hallar istisna kimi qiymətləndirilməli və səbəbləri xüsusi araşdırılmalıdır. Nəticə etibarilə, mobil telefonun mövcudluğu şagirdlərin gələcək planlarını məhdudlaşdırmır. Əksinə, onun effektiv istifadəsi təhsildə müsbət nəticələrə yol aça bilər. Bu gün aşağı sinif şagirdlərinə də valideyn nəzarəti ilə mobil telefonların verilməsi geniş yayılmış və cəmiyyət tərəfindən qəbul olunmuş bir praktikadır”.
