Azərbaycanda internetə girişlə bağlı məhdudiyyətlər hələlik qüvvədədir. Bu barədə Nəqliyyat, Rabitə və Yüksək Texnologiyalar Nazirliyindən bildiriblər. Qeyd olunub ki, hələlik bəzi internet resurslara tətbiq olunan məhdudiyyətlərin nə vaxt aradan qaldırılacağı ilə bağlı dəqiq məlumat yoxdur.
Məsələ ilə bağlı fikirlərini "Şərq"ə bölüşən internet-media eksperti Səbuhi Abbasov diqqətə çatdırıb ki, gələn həftənin ilk günlərində internetə olan məhdudiyyətlər aradan qaldırıla bilər. O vurğulayıb ki, birdən-birə müharibə ilə bağlı tətbiq olunan bütün məhdudiyyətlərin aradan qaldırılması doğru deyil:
"Bildiyimiz kimi, müharibə həm cəbhədə, həm də informasiya sahəsində çox ciddi gedir. Məkrli düşmən kifayət qədər təxribat həyata keçirməyi planlaşdırmışdı.
Bütün bu planların qarşısını almaq və bu təxribatların hərbi proseslərə təsirini minimuma endirmək üçün müəyyən məhdudiyyətlər tətbiq olundu. Bilirsiniz ki, bu məhdudiyyətlər əsasən, sosial şəbəkələri əhatə edirdi və onların bir çox funksiyalarının bağlanması ilə nəticələnmişdi. Məlum olduğu kimi, noyabrın 9-da üçtərəfli bəyanat imzalandı.
Bununla da, Azərbaycanın qələbəsi tam rəsmiləşdi. Amma Ermənistanda siyasi baxımdan hazırda çox ciddi təxribatlar var. Çox ciddi çağırışlar edilir. Erməni siyasətçiləri dörd gün ərzində müqavilənin ratifikasiya məsələsini gündəmə gətirməyin mümkün olduğunu deyirlər. Ona görə də biz gözləməliyik, səbr etməliyik. Ən azı bu həftə ərzində səbrli olmalıyıq".
Ekspert vurğulayıb ki, ilk növbədə Ermənistanın müqavilə öhdəliklərinə əməl edəcəyinə əmin olmalıyıq:
"Biz 30 ildir ki, torpaqlarımızı işğalda saxlayan hərbi xunta ilə müqavilə imzalayarıq. Onların bu müqavilə şərtlərinə tam əməl edəcəyinə inanmaq, sadəlövhlük olardı. Düşünürəm ki, biz tamamilə rəsmiləşdirilmiş qələbəmizə heç bir təxribatın olmayacağına əmin olduqdan sonra internetə olan məhdudiyyətlər aradan qalxa bilər".
