Hindistan mediasının tirajladığı dezinformasiyalar Qərbdən ötürülən tezislər əsasında hazırlanır
Hindistan mətbuatı iddia edib ki, Azərbaycan Zəngəzur dəhlizinin açılması üçün Türkiyənin dəstəyi ilə Ermənistana qarşı hərbi əməliyyatlara başlamağı planlaşdırır. Rusiya XİN dərhal buna reaksiya verdi və bildirildi ki, Cənubi Qafqazda nəqliyyat blokadasının güc yolu ilə götürülməsi variantı qəbuledilməzdir. Qeyd olundu ki, bu məsələdə Moskvanın mövqeyi bəllidir. Hindistan mətbuatı bu barədə Ukrayna Baş Kəşfiyyat İdarəsinin “məxfi sənədlərində” məlumatın yer aldığını bildirmişdi. Lakin Ukrayna Baş Kəşfiyyat İdarəsi bu məlumatı təkzib edib.
Millət vəkili Elçin Mirzəbəyli "Sherg.az"a deyib ki, bu cür dezinformasiyaların yayılmasında Hindistanın öz maraqları da var. Deputat bildirib ki, Pakistanın baş nazirinin Azərbaycana səfəri və ölkəmizdə verilən mesajlardan sonra Hindistanın bu və ya digər formada reaksiya verməsi gözlənilən idi:
"Azərbaycan-Pakistan münasibətlərinin inkişafı rəsmi Dehli tərəfindən aqressivliklə qarşılanır. Prinsip etibarı ilə bütövlükdə Azərbaycan-Pakistan və Türkiyə birliyini, bu üçlü platformanı özlərinə qarşı təhdid kimi görürlər. Bu aspektdən Hindistan mediası siyasi sifariş əsasında Azərbaycan və Türkiyənin bölgədə guya hərbi əməliyyatlara başlayacağı və Zəngəzur dəhlizinin güc yolu ilə alınacağı ilə bağlı məqsədyönlü şəkildə informasiyalar tirajlayırlar. Burada Qərb dairələrinin bilavasitə iştirakı mümkündür. Bəlli olduğu kimi Hindistan özünü müstəqil güc təqdim etməyə cəhd göstərsə də, mahiyyət etibarı ilə, xüsusən Cənubi Qafqazdakı proseslərdə əsasən Fransanın təhriki ilə hərəkət edir. Burada Qərbdən ötürülən tezislərin də rol oynaması mümkündür".
Parlament üzvü vurğulayıb ki, bölgəmizdə hərbi əməliyyatların baş verməsi gözlənilmir:
"Rusiyanın reaksiyası da qəribədir. Hindistan mediasında səslənən hansısa mülahizəyə Rusiyanın XİN səviyyəsində reaksiya verməsi müəyyən qədər şübhəli görünür. Sanki burada qarşılıqlı şəkildə "pas"laşmanın şahidi oluruq. Ümid edək ki, bu, əslində, Rusiyanı bölgə ilə bağlı ümumi təhlükəsizlik konsepsiyasından çıxış edərək səsləndirdiyi fikirlərdir. Əslində, Hindistanın davranışları, atdığı addımlar son nəticədə həm də Rusiyanın maraqlarına ziyan vurur. Amma nədənsə, Moskvanın son zamanlar gedişlərində ənənəvi siyasətə uyğun gəlməyən yeni istiqamətlər nəzərə çarpır".
