İran dinc nüvə enerjisini inkişaf etdirmək qətiyyətini təsdiqləmək üçün ABŞ-la dolayı danışıqlar aparır və heç vaxt öz hüquqlarından əl çəkməyəcək.
Bunu İran Prezidenti Məsud Pezeşkian deyib.
"Biz müharibəyə can atmadığımızı sübut etmək üçün danışıqlar aparırıq. İran heç vaxt nüvə silahına sahib olmaq istəməyib və buna cəhd etməyəcək, lakin heç bir halda da dinc nüvə enerjisinə dair hüquqlarından imtina etməyəcək", - Pezeşkian bildirib.
Politoloq Əhəd Məmmədli Sherg.az-a bildirib ki, İranda Ali dini liderlə Prezidentin fikirlərinin üst-üstə düşməməsi mümkündür:
"Sadəcə burada "yaxşı polis-pis polis" oyunu ola bilər. İranda dini liderlə prezident eyni məsələdə fərqli mövqedən çıxış edirlər. Məsələn, ABŞ-də respublikaçılar hakimiyyətdə olanda zəbt, talanla məşğul olurlar. Daha sonra demokratlar beynəlxalq hüquq libasında gəlirlər. Rusiyada Jirinovski ağzına gələni deyir, Putin isə bunun sadəcə onun şəxsi fikirləri olduğunu, yanlış etdiyini bildirir. Bu mənada əslində Pezeşkianla Xameneinin siyasəti eynidir. Lakin hərəsi öz rolunu oynayır. İranın nüvə silahına sahib olma məsələsi artıq 40 ildir davam edir. Yenə də ABŞ-İran danışıqları başlayıb. Hansı nəticənin razılaşdırılmasından asılı olmayaraq iki ölkə arasında ciddi düşmənçiyilin və ya müharibənin başlaması ehtimalı yoxdur. Onlar sadəcə Yaxın Şərqdə və dünyada öz siyasi kimliklərini göstərmək üçün bu cür addımlar atırlar".
