AMB valyuta mübadiləsi fəaliyyətinə görə kapital tələbi qoyub. Yeni qərara əsasən, valyuta mübadiləsi fəaliyyətinə lisenziya almaq istəyən şəxslərə, eləcə də hər obyektə görə nizamnamə (şərikli) kapitalının minimum həddi müəyyən edilib. Belə ki, valyuta mübadiləsi fəaliyyəti üçün kapital tələbi I bölgədə (Bakı) 600 min manat, hər əlavə obyektə görə 300 min manat, II bölgədə (Abşeron, Sumqayıt və Gəncə) 450 min manat, hər əlavə obyektə görə 150 min manat, III bölgədə (I, II və IV bölgələr istisna olmaqla, həmçinin Naxçıvan MR) 375 min manat, hər əlavə obyektə görə 75 min manat, IV bölgədə (Şərqi Zəngəzur və Qarabağ iqtisadi rayonlarının işğaldan azad edilmiş əraziləri) 300 min manat, hər əlavə obyektə görə 0 manatdır.Bundan başqa, valyuta mübadiləsi fəaliyyətinə lisenziya və ya onun əlavəsini almaq istəyən şəxs müvəkkil bankda minimum nizamnamə (şərikli) kapitalının 10%-i məbləğində girov vəsaiti yerləşdirməlidir. Valyuta mübadiləsi fəaliyyətinə lisenziya almış şəxslər bu tələblər qüvvəyə mindiyi tarixdən 6 ay ərzində minimum nizamnamə kapitalının formalaşdırılması, habelə girov vəsaitinin məbləğinin yerləşdirilməsi ilə bağlı müvafiq tədbirlər görməli və bununla əlaqədar müvafiq sənədləri həmin müddətdə AMB-yə təqdim etməlidirlər.
Məsələ ilə bağlı "Sherg.az"a açıqlama verən iqtisadçı -ekspert Eyyub Kərimli bildirib ki, bu cür qaydaların tətbiqi ümumi bank sektorunun sağlamlaşmasına və fəaliyyətlərin şəffaflaşlmasına təsir edir:
"Sözsüz ki, digər tərəfdən kapital həddinin formalaşdırılması gələcəkdə bu sahədə olan əməliyyatların təhlükəsiz,s abit, dayanıqlı həyata keçirilməsinə müsbət təsir göstərəcək. Həmçinin, kapitalın artırılması bankların işinin daha ciddi qurulmasına və hansısa bir sarsıntıların yaşanmamasına yol açacaq. Bu qərar valyuta mübadiləsini həyata keçirən Mərkəzi Bankla əlaqələrini möhkəmləndirməsi üçün geniş həcmli valyuta əməliyyatlarının kapitallaşmasının artımı səbəbindən ehtiyyac var idi. Düşünürəm ki,burada məzənnə sabitliyinin təmin edilməsi də valyuta tələb təklifin idarə olunmasına müsbət tərəfdən təsiri olacaq".
