“Həyata keçirilən tədbirlər və qanunvericiliyin təkmilləşdirilməsi nəticəsində taksi fəaliyyətində xidmət keyfiyyətinin yüksəlməsi müşahidə edilir”.
Sherg.az xəbər verir ki, bu barədə rəqəmsal inkişaf və nəqliyyat nazirinin müavini Rəhman Hümmətov məlumat verib.
O bildirib ki, Bakıda taksilərin sayı 67-70 mindən 35 minə enib: “Qanunla müəyyən edildiyi kimi yaşı çox olan avtomobillər artıq taksi xidmətlərindən kənarlaşdırılıb. Bu avtomobillər taksi aqreqatorlarının sistemindən çıxarılıb”.
AYNA sədri Anar Rzayev isə əlavə edib ki, həyata keçirilən tədbirlərin əsas məqsədi ictimai nəqliyyatın təşviqi və şəxsi minik avtomobillərindən istifadəni azaltmaqdır: “Bu dövrdə 200 avtobus təmir edilərək xidmətə verilib, yeni marşrut xətləri açılıb, ümumilikdə 560 avtobus ictimai nəqliyyat sisteminə əlavə edilib”.
Nəqliyyat məsələləri üzrə ekspert Yasin Mustafayev “Sherg.az”a bildirib ki, tələblərimizə cavab verməyən nəqliyyat vasitələri artıq dövriyyədən çıxıb:
“Onların yerinə isə yeni tələb və qaydalara uyğun olan nəqliyyat vasitələri cəlb edilib. Eyni zamanda da müxtəlif tələblər qoyulub. Bu tələblər əvvəlcədən də var idi, sadəcə olaraq artıq formalaşdırılaraq qüvvəyə mindi. Nəqliyyat vasitələrinin xəttə çıxmadan öncə texniki baxışdan, sürücülərin isə tibbi müayinədən keçməsi artıq vacibdir. Avtomobillərdə isitmə-soyutma sistemləri, təchizatın aviasiya olunması və Avropa standartı olması kimi tələblər mövcuddur. Qoyulan tələblər də keyfiyyətin yüksəldilməsinə xidmət edir. Bu sahə üzrə məşğul olan sürücülərin təlimlərə cəlb edilməsi, bilik və xidmət səviyyələrinin artırılması əsas prioritet məsələlərdən biridir. Qəbul edilən qayda və qanunlara əməl edilməsi keyfiyyətin artmasına səbəb olacaq. Son dövrlər biraz narazılıqlar var. Çünki əvvəlki kimi taksi bolluğu yoxdur. Hətta insanlar biraz gözləməli olur və qiymət artımı müşahidə edilir. Lakin biz keyfiyyət, komfort istəyiriksə, qiymət artımı da olmalıdır. 70 min taksinin içərisindən tələblərə və məqsədəuyğun olan taksilər seçilibsə, azalması da normal haldır. Belə olan halda taksi sifarişi edərkən insanlar müəyyən qədər gözləməli olacaqlar. Dünyanın hər yerində belədir. Keyfiyyətsiz taksinin çoxluğundansa, təhlükəsiz və yüksək keyfiyyətli taksinin tətbiq edilməsi daha məqsədəuyğundur”.
