Donald Tramp Ukrayna münaqişəsinin həllində Rusiya Prezidenti Vladimir Putinlə əməkdaşlıq edərsə, NATO və Qərb təhlükəsizlik sistemini qaranlıq gələcək gözləyir. Bunu “Blumberq”in yazarı Maks Qastinqs deyib. O bildirib ki, Avropa 1941-ci ildən bəri heç vaxt olmadığı qədər ABŞ-dan daha da uzaqda yeni həyata hazırlaşır. Ümumi mənzərə aydındır: Donald Tramp Vladimir Putinlə Ukrayna problemini həll etmək üçün verdiyi sözə əməl etsə, NATO və Qərbin kollektiv təhlükəsizliyinin gələcəyi qaranlıqdır. Co Bayden Avropanın təhlükəsizliyinin ABŞ-ın həyati maraqları arasında olduğuna inanan Ağ Evin sonuncu rəhbəri olacaq.
Sosial Tədqiqatlar Mərkəzinin sektor müdiri, politoloq Tural İsmayılov “Sherg.az”a söyləyib ki, Donald Trampın Rusiya-Ukrayna müharibəsinə özünəməxsus yanaşması mövcuddur:
“Donald Trampın hakimiyyətə gəlmədən öncə verdiyi açıqlamalar və vədlərdə sözügedən problemlə bağlı özünəxas yanaşmalarının olduğunu vurğulamışdı. Co Bayden və demokratlardan fərqli olaraq Donald Tramp inanır ki, Rusiya və Ukrayna arasında kompromisi həll etmək üçün durmadan Ukraynanı silahlandırmaq yerinə Rusiya ilə də danışıqlar aparmaq lazımdır. Trampın bu yanaşması çox rasionaldır. Çünki Tramp fərqindədir ki, Rusiyayla hansısa anlaşmalar əldə etmədikcə Ukraynanı silahlandırmaq nəticəsiz qalacaq. Həmçinin əhali və ərazi baxımından Ukrayna Rusiya ilə rəqabət aparacaq vəziyyətdə deyil. Belə olan halda isə Ukranyaya maliyyə və hərbi yardımların sonsuz şəkildə davam etməsinin gələcəkdə Amerika və NATO əhalisi tərəfindən narazılıqla qarşılanacağını Tramp başa düşür. Digər tərəfdənTramp birinci prezidentliyi dövründə də Rusiya ilə konfrantasiyanı dərinləşdirməmişdi. Eyni zamanda Tramp siyasətlə məşğul olmadığı dövrlərdə də Rusiya elitasıyla normal münasibətlərə malik idi. Bu gün Trampın Rusiya-Ukrayna müharibəsindəki rasional mövqeyini qəbul etməyən Bayden və demokratlara yaxın olan ekspertlər ona qarşı dezinformasiya kampaniyası həyata keçirməyə çalışırlar”.
