Uşaqlar mütləq peyvənd olunmalı, valideynlər də peyvənd qrafikinə əməl etməlidirlər
“Hazırda 3 uşağımız xəstəxanadadı, sığınacaqda “sistem” altında olanlar da var”. Bunu “Şərq”ə açıqlamasında "Azərbaycan Uşaqları" İctimai Birliyinin sədri və Uşaq Sığınacağı Reinteqrasiya Mərkəzinin rəhbəri Kəmalə Ağazadə bildirib. Qeyd edək ki, K.Ağazadə sığınacaqdakı uşaqlar arasında səhhətində problemlər yarananların olduğu barədə feysbuk səhifəsində paylaşım edib.
“Özünüzü virusdan qoruyun. 2 uşağımız xəstəxanada,6 uşağımız isə sığınacaqda müalicə alır. Daha 24 uşaq virusa namizəddir. 14 uşağımız yaxşı ki, sanatoriyadadır. Allah şəfa versin xəstələrimizə” qeyd edən K.Ağazadə uşaqların rotavirus xəstəliyinə yoluxduqlarını bildirib. “Sherg.az”a açıqlamasında K.Ağazadə qeyd etdi ki, bu gün uşaqlardan daha biri xəstəxanaya yerləşdirilib:
- Vəziyyəti digərlərinə nisbətən ağır olan uşaqlar Nizami rayonundakı Uşaq Yoluxucu Xəstəliklər Xəstəxanasına yerləşdirilib. Əvvəlcə 2 uşağımız, sonra daha biri xəstəxanaya yerləşdirildi. Xəstəxanada həkim nəzarəti altında müalicələri davam edir. Sığınacaqda sistem vurulan uşaqlarımız var. Nəzarət altındadırlar. Bəzilərində işləmə-qusma, bəzilərində isə yüksək qızdırma halları müşahidə olunur. Əlavə olaraq, uşaqların bəzilərində burnundan qan açılması halları da baş verdi. Hazırda sığınacaqdakı 6 uşağın vəziyyəti orta qiymətləndirilir, müalicələr davam edir.
Sədr sığınacağın dezinfeksiya olunduğunu dedi: "İshal halı olduğundan hər ehtimala qarşı sığınacaq dezinfeksiya olunub. Sığınacaq böyük bir müəssisədir. Bir uşaq yoluxan kimi xəstəlik kütləvi hal alır. Buna görə də dezinfeksiya mütləqdir”.
Həkim-terapevt Şahvələd Məmmədov “Sherg.az”a açıqlamasında qeyd etdi ki, ümumiyyətlə, uşaqların yerləşməsinin, gediş-gəlişinin kütləvi olduğu müəssisələr - körpələr evi, uşaq bağçası, orta məktəblər vaxtaşırı dezinfeksiya edilməli, sanitar-gigiyenik şərait daim nəzarət altında olmalıdır:
- Təəssüf ki, sanitar qovşağı təmirsiz, bərbad vəziyyətdə olan, hətta sanitar qovşağı ümumiyyətlə işləməyən tədris müəssisələri də var. Elə bir şəraitdə hansı təmizlikdən, gigiyenik təhlükəsizlikdən danışmaq olar? Təsəvvür edin ki, su gəlməyən müəssisədə uşaqlar tənəffüslərdə əlləri yuyulmadan yemək yeyirlər. Bu şəraitdə hər cür yoluxmanın baş verməsi, xəstəliyin yayılması labüddür. Uşaq müəssisələri daim nəzarət altında olmalı, mütəmadi şəkildə dezinfeksiya edilməli, sanitar qovşağın tam şəkildə fəaliyyəti təmin edilməlidir. Yeməkxana, məktəb bufetləri tər-təmiz olmalı, aşbazların, yemək paylayanların sağlamlıq haqqında tibbi arayışı olmalıdır. Uşaq qidalarının keyfiyyətinə nəzarət edilməlidir. İstifadə müddəti bitmiş ərzaqlardan istifadə edilməməlidir. Bunlar uşaqların mədə-bağırsağında problem yaradır, ishala yol açır.
Ş.Məmmədov bildirdi ki, hazırda mövsümi xəstəliklərin yayıldığı dövrdür:
- Mövsüm dəyişiklikləri dövründə xəstəliklər arta bilir. Yoluxma halları çoxalır. Söhbət iri müəssisələrdən, kütləvi toplaşma yerlərindən gedirsə, təhlükə daha realdır. Uşaqlar mütləq peyvənd olunmalı, valideynlər də peyvənd qrafikinə əməl etməlidirlər.
