“Pakistanın Hindistanın təcavüzü zamanı göstərdiyi təmkin bütün dünya paytaxtlarında təqdir edildi, onlar Dehlinin siyasət və mediasının “tamaşa”sını da gördülər”.
Teleqraf xəbər verir ki, bunu Pakistanın keçmiş xarici işlər naziri Hina Rabbani Kar deyib.
“Real müharibə Bollivuddakı (hind filmlərindəki) döyüş səhnələrindən fərqlidir. Realda eyni şeyləri etmək bir az başqa məsələdir. Biz heç vaxt müharibə, münaqişə və təxribatın tərəfində olmayacağıq, çünki bunlardan əziyyət çəkmişik”, - diplomat bildirib.
Rabbani Kar əlavə edib ki, Hindistan terrorizmi silahlandırıb:
“Hindistan bu problemlə ciddi məşğul olsaydı, dialoq masası və danışıqlardan qaçmazdı”.
Sabiq nazir terrorizmin təkcə bir ölkənin deyil, qlobal problem olduğunu vurğulayıb.
Xatırladaq ki, Hina Rabbani Kar 2022-2023-cü illərdə Pakistanın xarici işlər naziri olub. O, Pakistanın xarici işlər naziri vəzifəsini tutan ilk qadındır.
