Futbol məşqçiliyi karyerasına "Qalatasaray"ın akademiyasında başlayan, daha sonra A komandada köməkçi məşqçi, "Roma"nın U-18 və "Spezia"nın U-19 komandalarında baş məşqçi olaraq çalışan Tuğberk Tanrıvermiş, ötən ilin oktyabr ayında "St. Pölten"in başına keçib.
Sherg.az xəbər verir ki, vəzifəyə başladığı zaman 2. Liqanın 9-cu həftəsi geridə qalmışdı və "St. Pölten" 9 xalla 12-ci pillədə qərarlaşmışdı. Tanrıvermişin rəhbərliyi altında komanda böyük yüksəlişə imza atdı. 35 yaşlı çalışdırıcının rəhbərliyində "St. Pölten" 19 oyunda 12 qələbə, 4 bərabərlik əldə edərək 40 xal topladı.
Aşağı Avstriya təmsilçisi 28-ci həftəni 49 xalla 4-cü sırada başa vurdu. Tuğberk Tanrıvermişin vəzifədə olduğu 19 həftəlik müddətdə komanda liqanın ən çox xal toplayan ikinci komandası oldu. Bu müddətdə 43 qol vuran "St. Pölten", eyni zamanda liqanın ən məhsuldar komandası oldu.
Tuğberk Tanrıvermiş mövsümün sonunda komandadan ayrılacaq.
Yaxın zamanda sahibləri dəyişən "St. Pölten"in yeni rəhbərliyi ilə görüşən gənc məşqçi, növbəti mövsüm üçün büdcənin ciddi şəkildə azaldılacağını öyrəndi. Əsas futbolçularla yolların ayrılacağı və transfer üçün büdcə ayrılmayacağı ona bildirildikdən sonra Tanrıvermiş mövsümün sonunda komandadan ayrılmağa qərar verib.
