Son olaraq yunan əsilli amerikalı soprano sənətçi Maria Kallasın həyatını canlandıran “Maria” filmində rol alan Oskar mükafatlı məşhur aktrisa Ancelina Coli, Kann Festivalında Trophée Chopard mükafatının 25-ci ildönümündə “xaç anası” kimi iştirak edəcək.
Sherg.az xəbər verir ki, Coli, 16 may tarixində Kann şəhərindəki Carlton çimərliyində keçiriləcək mərasimdə gənc aktyorlar Mari Kolomb və Finn Bennettə mükafatlarını təqdim edəcək.
Tədbir Kann Kino Festivalının prezidenti İris Knobloch, baş nümayəndə Tieri Fremo və Chopard şirkətinin həmsədri Karolin Şoyfelenin ev sahibliyində axşam yeməyi zamanı baş tutacaq.
Ancelina Coli, bu barədə hisslərini ifadə edib:
“Gənc sənətçilərlə tanış olmaq və onların fövqəladə işlərinə şahidlik etmək imkanı əldə etdiyim üçün çox həyəcanlıyam.”
Karolin Şoyfele isə aktrisa barədə bunları söyləyib:
“Ancelina Colinin müstəsna kino karyerası və dünyada dəyişiklik yaratmağa olan bağlılığı onu əla bir rol modelə çevirir. Əminəm ki, bu il mükafat alacaq gənc istedadlar onun təcrübəsindən ilham alacaq.”
Mari Kolomb, “Laetitia” serialı ilə tanınıb və “Les Magnétiques” və “As Bestas” kimi filmlərdəki performansları ilə diqqət çəkib.
İrlandiyalı-ingilis aktyor Finn Bennett isə son olaraq “Warfare” filmində rol alıb.
