Avropa Birliyi (AB) çox vaxt ABŞ-la Çindən daha pis davranır.
Bu sözləri ABŞ Prezidenti Donald Tramp ölkəsinin AB ilə ticarət əlaqələrini şərh edərkən deyib.
“Avropa Birliyi bir çox cəhətdən Çindən daha yaramazdır”, - deyə Ağ Ev rəhbəri bildirib.
Trampın sözlərinə görə, AB ölkələri ABŞ-a qarşı çox ədalətsiz davranıb.
Politoloq Elşad Mirbəşiroğlu Sherg.az-a bildirib ki, hazırda AB və ABŞ münasibətlərində gərginlik mövcuddur:
"Xüsusilə AB ilə respublikaçılar arasında həmişə fikir ayrılığının olması tarixi tendensiyadır. Trampın rəhbərliyi dövründə bunu daha aydın müşahidə etdik. Xatırlayaq ki, ABŞ-də son prezident seçkilərində Avropa ölkələri demokratların namizədlərini dəstəkləyirdilər. Vaşinqton Trampın mövqeyinə uyğun olaraq Ukrayna məsələsində Avropa ilə əvvəlki kimi eyni cəbhədən çıxış etmədi. Ağ Evin sahibi Putinlə danışıqlara başladı. Həmçinin Münhen təhlükəsizlik konfransında ABŞ-nin vitse-prezidenti Avropa liderlərini ciddi tənqidə məruz qoyaraq onların maraqlarına zidd mövqe sərgilədi. Təsadüfi deyil ki, 2 dəfə Parisdə, Böyük Britaniyada, Ukrayna ilə bağlı sammitlər keçirilib. Avropa ölkələri Kiyevə dəstək məqsədi ilə müxtəlif addımlar atıb. Eyni zamanda Tramp digər ölkələrə olduğu kimi Avropaya da ABŞ-a ixrac olunan məhsullara rüsumların tətbiq edilməsi haqqında qərar verdi. Bu isə münasibətlərə ciddi şəkildə mənfi təsir göstərdi. Sözsüz ki, London və Vaşinqton hər zaman eyni cəbhədən çıxış edir. Böyük Britaniyanın AB-dən çıxmasındakı səbəb həmişə ABŞ-nin yanında yer ala bilməsidir. Keir Starmer boş yerə demirdi ki, ABŞ olmadan təhlükəsizlik məsələlərinin effektiv həlli mümkün olmaz".
Politoloqun sözlərinə görə, AB-nin təhlükəsizliyi ABŞ-dən birbaşa asılıdır:
"Tramp Avropa ölkələri üzərində Vaşinqtonun təsir mexanizmlərini gücləndirməyə çalışır. AB özünün emosional narazılıqlarını biruzə versə də, nəticədə ABŞ-a münasibətdə hansısa praktik addım atmaq potensialına sahib deyil".
