Kiyevin (Rusiya tərəfindən işğal edilmiş) ərazilərdən imtina etməsi, Zaporojye atom elektrik stansiyasından istifadə və Ukraynanın Qara dənizə çıxışı məsələsi münaqişənin nizamlanması üzrə danışıqların əsas mövzusu olaraq qalır. Bu barədə ABŞ prezidentinin xüsusi nümayəndəsi Stiven Uitkoff bildirib. Amerika rəsmisi bildirib ki, burada əsas məsələlər (Rusiyanın işğal etdiyi) regionlar, atom elektrik stansiyası və ukraynalıların necə dənizə çıxa bilmələridir. Düşünürəm ki, məsələlərin sayını azaltmaq üçün çox yaxşı iş görmüşük. Əsas məsələlər beş regionla bağlıdır. Rusiya bu bölgələrdən ikisi üzərində böyük nəzarətə malikdir. Ukraynalılar digər üç bölgə üzərində müxtəlif dərəcəli nəzarətə malikdirlər, ona görə də söhbət vəziyyəti necə qiymətləndirməyimizdən gedir.
Siyasi Tədqiqatlar Mərkəzinin sektor müdiri, politoloq İlyas Hüseynov Sherg.az-a söyləyib ki, Rusiya və Ukrayna arasında sülhün əldə olunması, atəşgəsin razılaşdırılması mühim prioritetdir:
“ABŞ öz xarici siyasətinin əsas gündəliyində Kiyev və Moskva arasında razılığın əldə edilməsini əsas məsələlərdən hesab edir. Səudiyyə Ərəbistanı və qardaş Türkiyədə keçirilən danışıqlar da məhz razılaşmalara yönəlib. Amma həssas məsələ bundan ibarətdir ki, Rusiya işğal etdiyi ərazilərdən geri çəkilmir, Ukrayna isə bununla barışmır. Belə olan halda ortada çox ciddi mübahisəli məsələlər yaranır. Buna görə də hazırda Ukraynanın siyasi rəhbərliyi ərazi itkilərini qəbul etmir. Hətta ərazi itkiləri hesabına sülh tezisi ilə də razılaşmır. Müharibə nəticəsində çoxlu itkilər, dağıntılar və Ukrayna əhalisinin böyük hissəsi ölkəni tərk etmək məcburiyyətində qalmasına baxmayaraq ölkənin gələcəyi uğrunda mübarizə davam edir.. Eyni zamanda Kursk istiqamətində də irəliləyiş və Ukraynanın müharibə şəraitində mövqeyi mütləq üstünlüyə imkan vermir. Belə olan halda vəziyyəti nizamlamaq ABŞ və digər dövlətlər üçün çox çətindir. Ümid edirəm ki, Türkiyədə keçirilən görüş nəticənin hasil olunması uğrunda böyük irəliləşə səbəb olacaq. Bununla da qardaş Türkiyənin beynəlxalq mövqeyi bir qədər güclənəcək”.
