Rusiyalı həmkarı Vladimir Putinlə söhbətdən sonra ABŞ Prezidenti Donald Tramp Ukrayna və Avropa İttifaqı (Aİ) liderlərinə bildirib ki, Amerika Rusiyaya qarşı yeni sanksiyalar tətbiq etmək niyyətində deyil.
Teleqraf xəbər verir ki, bu barədə “Axios” məlumat yayıb.
Nəşr yazır ki, Amerika lideri Ukrayna Prezidenti Volodimir Zelenski və digər avropalı həmkarlarına Rusiya ilə danışıqlara sadiq olduğunu əsas gətirərək belə deyib. Portalın mənbələrinin iddiasına görə, ABŞ Prezidenti Rusiyanın razılaşmaya nail olmaq istədiyinə və dərhal atəşkəslə bağlı birbaşa danışıqlara başlamağa razı olduğuna əmin olduğunu bildirib.
“Axios” əlavə edib ki, Avropa liderləri Donald Trampın Rusiyaya qarşı yeni sanksiyalar tətbiq etmək istəməməsi ilə bağlı bəyanatından, həmçinin Vladimir Putinə duyulan hörmətli tonundan şoka düşüblər. Mənbə vurğulayıb ki, Tramp bunu Almaniya, Ukrayna, İtaliya, Finlandiya və Fransa liderləri, həmçinin Avropa Komissiyasının rəhbəri Ursula fon der Leyenlə söhbəti zamanı deyib. Portalın mənbələrinə görə, Volodimir Zelenski bu söhbəti pis hesab edib.
“Bu, Trampın Putinlə telefon danışığından dərhal sonra baş verib”, - məlumatda deyilir.
Xatırladaq ki, mayın 19-da Putin və Tramp arasında iki saatadan çox davam edən telefon danışığı olub. Danışıqlardan sonra hər iki lider söhbətin konstruktiv və səmimi olduğunu iddia edib.
