İyunun 4-də Azərbaycan Prezidenti İlham Əliyev ilə İran Prezidenti Məsud Pezeşkian arasında telefon danışığı olub. Bu barədə Prezidentin Mətbuat Xidməti məlumat yayıb.
İran Prezidenti İlham Əliyevi və Azərbaycan xalqını Qurban bayramı münasibətilə təbrik edib, rifah və tərəqqi arzularını çatdırıb. Dövlət başçımız da Pezeşkianı və dost İran xalqını bayram münasibətilə təbrik edib.
Pezeşkian Azərbaycana rəsmi səfərini və həmin səfər çərçivəsində aparılan səmərəli müzakirələri məmnunluqla xatırlayıb. Prezident İlham Əliyev də bu səfərin nəticələrini yüksək qiymətləndirib.
Telefon danışığı zamanı Məsud Pezeşkianın səfəri zamanı verilən tapşırıqların icrası istiqamətində iki ölkənin aidiyyəti qurumlarının fəal əməkdaşlıq etdiyi qeyd olunub. Bakı-Təbriz aviareysinin bərpası və Bakı-Tehran reyslərinin sayının artırılması xalqlar arasında təmasların artmasına töhfə verəcəyi vurğulanıb.
Tərəflər Azərbaycan-İran əlaqələrinin hazırda dönüş mərhələsində olduğunu qeyd edib və münasibətlərin müxtəlif sahələrdə dinamik inkişaf edəcəyinə ümid ifadə olunub. Eyni zamanda, qarşılıqlı maraq doğuran digər məsələlər ətrafında fikir mübadiləsi aparılıb.
Milli Məclisin deputatı Bəhruz Məhərrəmov Sherg.az-a söyləyib ki, məlumdur ki, Azərbaycan Respublikası başqa dövlətlərlə, o cümlədən cənub qonşumuz İranla münasibətlərini hamılıqla qəbul edilmiş beynəlxalq hüquq normalarında nəzərdə tutulan prinsiplərə əsasında inkişaf etdirməkdə maraqlıdır:
"Lakin sirr deyil ki, bir çox güclər, o cümlədən Tehranda müəyyən dairələr İran və Azərbaycan arasında mümkün gərginliyə potensial fürsət kimi baxırdılar. Lakin cənab İlham Əliyevin İrana münasibətdə uğurlu, zərgər dəqiqliyi ilə həyata keçirdiyi siyasi gedişlər prosesləri Azərbaycanın lehinə çevirdi. Üstəlik, münasibətlərimizdə son ciddi gərginliyin ardından, İran İslam Respublikasının Prezidenti Məsud Pezeşkianın Azərbaycana rəsmi səfəri və Bakıdakı təmaslar ölkələrimiz arasında münasibətlərdə yeni səhifəyə çevrildi. Azərbaycan və İran Prezidentləri arasında Qurban bayramı münasibəti ilə telefon danışığının ritorikası ilk növbədə, heç şübhəsiz ki, zaman-zaman müəyyən təlatümlərin müşahidə olunduğu Bakı-Tehran münasibətlərinin hazırda yüksək səviyyədə olmasının təzahürüdür".
Deputat qeyd edib ki, əlaqələrin hazırkı səviyyəsi Bakı-Tehran mümkün gərginliyinə fürsət kimi baxan niyyətlər fonunda eyni zamanda cənab İlham Əliyevin növbəti qlobal miqyaslı qələbəsi sayılmalıdır:
"Çünki, cari arzuolunan konfiqurasiyanın təməlində Bakının ötən dövr ərzində kifayət qədər təmkinli davranaraq diqqəti ayrı-ayrı dairələrin ucuz bəyanatlarına yox, gələcək birgə əməkdaşlıq çərçivələrinə yönəltməsi, boş ritorika əvəzinə Bakı konkret fəaliyyətlərə üstünlük verməsi dayanır. Möhtərəm Prezidentin mətbuata birgə bəyanatda ifadə etdiyi kimi,
"biz bütün istiqamətlər üzrə bir-birimizə daha yaxın olmağa çalışırıq" ".
