Rusiya ordusu Ukraynanın şərqində hücumlarını gücləndirərək, səylərini Donetsk vilayətinin strateji şəhəri Pokrovska yönəldib.
Teleqraf xəbər verir ki, bu barədə “Financial Times” məlumat yayıb.
Nəşr yazıb ki, aylarla ləng irəliləyişdən sonra Rusiya bölmələri şəhər ərazisinə daxil olub, Ukrayna qüvvələri onların irəliləyişinin qarşısını almaq üçün şiddətli döyüşlər aparır.
Rusiya Silahlı Qüvvələrinin Baş Qərargah rəisi Valeri Gerasimov bundan öncə təxminən 5500 Ukrayna hərbçisinin Pokrovsk yaxınlığında mühasirəyə alındığını açıqlayıb. Amma Ukrayna Prezidenti Volodimir Zelenski Pokrovskda vəziyyətin çox çətin olduğunu etiraf etsə də, Gerasimovun iddiasını “tamamilə yalan” adlandırıb.
Hərbi analitik Kostyantin Maşovets nəşrə deyib ki, hələlik Ukrayna bölmələrinin tam mühasirəyə alınmasından danışmağa əsas yoxdur: “Amma təhlükə kifayət qədər realdır, düşmən əsas istehkamlardan yan keçərək cinahlardan şəhərə nüfuz edən kiçik qruplardan istifadə edir”.
Analitikin sözlərinə görə, 3-5 nəfərlik rus piyada qrupları şəhərin cənub hissəsində fəal şəkildə hərəkət edir, müdafiədə xaos yaradır, Ukrayna qoşunlarının diqqətini yayındırır.
Pokrovskdan əlavə, Rusiya qüvvələri Donetsk bölgəsində yerləşən Liman və Kostyantinivkada da irəliləyir.
Həmçinin “DeepState” monitorinq qrupu bildirib ki, Ukrayna ordusu avqustda Rusiyanın qəfil hücumundan sonra itirilən Pokrovskdan şimalda üç kəndi geri alıb. Əvəzində Rusiya qoşunları Kupyanskda (Xarkov vilayəti) şəhərin mərkəzi rayonlarına, cənubda isə Dnepropetrovsk vilayətinin bəzi ərazilərinə doğru irəliləyiblər.
