Ukraynanın baş nazirinin birinci müavini və iqtisadiyyat naziri Yuliya Sviridenko ABŞ-la birgə investisiya fondunun yaradılmasını nəzərdə tutan faydalı qazıntılara dair sazişin imzalandığını təsdiqləyib.
O, bu haqda “Facebook” hesabında paylaşım edib.
Sazişə əsasən, Ukrayna yeni icarə haqqı və yeni sahələrdə faydalı qazıntıların çıxarılması üçün yeni lisenziyalardan əldə olunan bütün gəlirin 50%-ni bu fonda verəcək.
ABŞ və Ukrayna fondun idarə olunmasında bərabər səsə sahib olacaqlar.
Politoloq Turab Rzayev Sherg.az-a deyib ki, sazişin bir sıra aspektləri var:
"ABŞ Ukrayna müharibəsinə milyardlarla dollar vəsait xərcləyib və bunun yerini doldurmaq istəyir. Avropa isə müharibəyə ayırdığı məbləği qaranti altına alıb, yəni Ukraynaya borc kimi sənədləşdiriblər. Digər tərəfdən Tramp münaqişəni bitirməkdə maraqlıdır. Buna görə də çalışır ki, müharibə sona çatmamış ABŞ-nin də burada faydası olsun. Eyni zamanda faydalı qazıntılara dair saziş Kiyev üçün də əhəmiyyət kəsb edə bilər. Öncəliklə Ukraynanı yenidən qurmaq üçün trilyonlarla vəsait lazımdır. Ölkənin bütün infrastrukturu dağıdılıb, əhalisi köçüb. Əgər birgə investisiya fondu yaradılarsa, ən azından başlanğıc dövrdə böyük vəsait cəlb olunacaq. Odur ki, Ukraynanın faydalı qazıntıları istismar edilməklə həm infrastrukturu, iqtisadiyyatı tənzimlənməyə başlayacaq, həm də yeni iş yerləri yaranacaq".
Politoloqun sözlərinə görə, Tramp təkcə faydalı qazıntıları yox, limanları, nəqliyyat xətlərini, o cümlədən Zaporojye Atom Elektrik Stansiyasını da istəyir:
"Bu isə Ukraynanın enerji təhlükəsizliyinin təmin edilməsi deməkdir. Məhz ABŞ bütün bunlara investisiya qoyduqdan sonra Rusiya bombardman edə bilməz. Nəticədə sülhə olan inam və Kiyevin təhlükəsizliyi üçün qarant artır. Ümumiyyətlə sözügedən saziş Ukraynanın iqtisadi müstəqilliyini və gələcəyini təmin etməsi baxımından dəyərləndirilməlidir".
