Keçmiş Amerika lideri və Respublikaçılar Partiyasından prezidentliyə namizəd Donald Tramp bildirib ki, gələn həftə ABŞ-yə səfəri zamanı Ukrayna lideri Volodimir Zelenski ilə görüşə bilər. Bu barədə "Reuters" agentliyi məlumat yayıb. Eyni zamanda ABŞ-ın vitse-prezidenti və Demokratlar Partiyasından prezidentliyə namizəd Kamala Harris də gələn həftə ABŞ-a səfəri zamanı Volodimir Zelenski ilə görüşməyi planlaşdırır. Bu barədə isə Bloomberg məlumat yayıb. Səfər zamanı Zelenski Ukraynanın NATO və Avropa İttifaqına üzvlük məsələsini gündəmə gətirə, həmçinin Kiyevə daha müasir silahların daimi tədarükü tələb edə bilər.
Politoloq Zeynal Əmrəliyev “Sherg.az”a söyləyib ki, Amerika Birləşmiş Ştatlarında keçiriləcək prezident seçkilərində namizədlərin xarici siyasətlə bağlı əsas müzakirə mövzusu Ukrayna müharibəsi olacaq:
“Eyni zamanda Yaxın Şərq müharibəsini də qeyd etmək yerinə düşər. Bunun fonunda namizədlərin hər biri maksimum şəkildə Ukraynaya dəstək olduqlarını göstərməklə ABŞ ictimaiyyətini məlumatlandırmaq niyyəti güdürlər. Buna görə də ABŞ-da prezidentliyə əsas namizədlərdən olan Donald Trump və Kamala Harrisin Ukrayna prezidenti Vladimir Zelenski ilə görüşü gözlənilən idi. Onlar görüşdə Zelenskini inandırmağa çalışacaqlar ki, prezident seçiləcəkləri təqdirdə Ukraynaya dəstəyi davam etdirəcəklər. Şübhəsiz ki, ABŞ-da Ukraynaya dəstəklə bağlı çıxış edən fondlar və siyasətçilər var. Onlar Rusiyaya qarşı aqressiv siyasət yürüdürlər. Hazırda onların prezident seçkilərində dəstəyi Harris və Trump üçün çox önəmlidir. Ona görə də Zelenskidən sözügedən məsələ ilə bağlı dəstək istəyəcəklər. Eyni zamanda Donald Trump çalışır ki, Ukrayna-Rusiya savaşı tezliklə başa çatsın və Qərb-Rusiya əlaqələri yenidən bərpa olunsun. Trumpın bununla bağlı sülh planı var idi və hakimiyyətə gələcəyi təqdirdə onu yerinə yetirəcəyini açıqlamışdı. Amma Ukrayna üçün Amerikada kimin hakimiyyətə gələcəyini müəyyənləşdirmək çətindir”.
