Britaniya və Avropa rəsmiləri tezliklə birgə müdafiə və təhlükəsizlik paktını açıqlamağa hazırlaşırlar.
Bunu “The Times” yazıb.
Belə ki, Avropa İttifaqından çıxan London yenidən onun müdafiə siyasətinin bir hissəsinə çevriləcək.
Pakt bu həftənin əvvəlində təqdim oluna bilər. Qeyd olunur ki, tərəflər arasında razılaşma Britaniya ilə Avropa İttifaqının yaxınlaşmasına gətirib çıxaracaq.
Məqalədə vurğulanır kimi, London və Aİ “ən böyük təhlükə” ilə üz-üzədir və müdafiə razılaşmasına ehtiyac var. Təhdidlərin xüsusilə Ukrayna münaqişəsi ilə bağlı olduğu bildirilir. Əlavə məlumat verilmir.
Siyasi şərhçi Əziz Əlibəyli Sherg.az-a bildirib ki, mayın 9-da Avropa liderləri Ukraynaya dəstək məqsədilə bəyanatlarla çıxış etdilər:
"Onların əsas mesajı bu idi: Ukraynanın təhlükəsizliyinin təmin olunması artıq təkcə Kiyevin deyil, bütövlükdə Qərb dünyasının və xüsusilə də Avropanın məsuliyyətidir. Bu kontekstdə Avropa İttifaqı Ukrayna ilə bağlı daha ciddi və təsirli addımlar atmaq niyyətində olduğunu bildirdi. Lakin bu qərarlara paralel olaraq, ABŞ Prezidenti Donald Trampın bəzi açıqlamaları diqqət çəkdi. Onun çıxışları göstərdi ki, ABŞ və Avropa arasında Ukrayna məsələsində tam harmonik bir yanaşma yoxdur. Xüsusilə də Avropanın Rusiya Prezidenti Vladimir Putinlə diplomatik dialoqa açıq yanaşması fonunda, Vaşinqtonun sərt mövqeyi iki tərəf arasında gərginliyin mövcudluğunu ortaya qoyur. Hazırkı vəziyyətdə belə görünür ki, Avropa bir tərəfdən Rusiya ilə mümkün görüşlərin təşkili üçün zəmin yaratmağa çalışsa da, digər tərəfdən ABŞ-ın bu prosesə mane olan mövqeyi səbəbindən təşəbbüsləri tam reallaşa bilmir".
Şərhçinin sözlərinə görə, Avropa artıq anlayır ki, ABŞ-siz addımlar atmaq məcburiyyətindədir.
