Avropa Parlamenti və Almaniyada casusluq qalmaqalı yaşanır. Pekinlə Avropa İttifaqı (Aİ) arasında gərginliyin aradan qaldırılması istiqamətində addımlar atılarkən, Almaniyada radikal sağçı AfD Partiyasından olan bir deputatın köməkçisinin Çinə casusluq etdiyi üzə çıxıb.
Teleqraf xəbər verir ki, Almaniya Bundestaqının deputatı Maksimilian Kraxın keçmiş köməkçisi Jian Quo Çinin xeyrinə casusluqda ittiham olunur.
Alman prokurorları Quonun “çox həssas” olaraq xarakterizə edilən 500-dən çox sənədi Çinə ötürdüyünü deyirlər.
Çin əsilli Almaniya vətəndaşı Quonun AfD siyasətçiləri haqqında məlumat topladığı və Almaniyadakı çinli müxaliflər barədə casusluq etdiyi iddia edilir. Bildirilir ki, 2019-2024-cü illər arasında toplanan sənədlərə Avropa Parlamentində aparılan danışıqlar və qəbul edilən mühüm qərarlar daxildir.
2002-ci ildən Çin Kəşfiyyat Xidmətində çalışdığı bildirilən Quonun 2024-cü ildən həbsdə olduğu vurğulanır.
2019-cu ildə Avropa Parlamentinin üzvü seçilən Maksimilian Krax casusluq qalmaqalı ilə heç bir əlaqəsinin olmadığını söyləyib.
Alman prokurorlar tərəfindən hazırlanan ittihamnamədə bir logistika xidmətində çalışan Yaqi X. kimi tanınan Çin vətəndaşı da ittiham edilib. İddiaya görə, Yaqi X. Leypsiq hava limanında hərbi göndərişlər, uçuşlar, yüklər və sərnişinlər haqqında məlumatlar toplamaqda Quoya kömək edib.
Ötən ilin sentyabrında həbs olunan 38 yaşlı Yaqi X. ABŞ-dən İsrailə hərbi yüklərin göndərilməsi barədə də Quoya məlumat ötürüb. Prokurorların sözlərinə görə, həm Yaqi X., həm də Qou sistematik olaraq Aİ və Almaniyadan Çinə məlumatlar göndəriblər.
Çin Xarici İşlər Nazirliyi məlumatın sızmasını “Çinə qarşı qarayaxma kampaniyası” adlandıraraq, məsələnin şişirdildiyini bəyan edib.
