Dağıstanda daşqınlar güclənməkdə davam edir, bir neçə rayonda təcili tədbirlər görülüb.
Sherg.az Azərtac-a istinadən xəbər verir ki, ən ciddi vəziyyət Gergebil rayonundadır, burada fövqəladə vəziyyət elan olunub.
Sel səbəbindən 100-dən çox sakin təxliyə edilib, 48 yaşayış məntəqəsi elektrik enerjisiz qalıb, 56 kəndlə nəqliyyat əlaqəsi kəsilib. Yerli su elektrik stansiyasından təcili suyun buraxılması səbəbindən Kizilyurt-Kostek avtomobil yolunun bir hissəsi bağlanıb.
Kaytaq rayonunda Ulluçay çayında suyun səviyyəsinin qalxması nəticəsində bənd qismən dağılıb, 13 yaşayış binasını su basıb. Sakinlər təxliyə ediliblər.
Çarodin rayonunda güclü sel avtomobili aparıb. Bundan əlavə, yerli sakinlərin sözlərinə görə, İrganay su elektrik stansiyasından suyun axını nəticəsində avtomobil yolunun təxminən 100 metr hissəsi yuyulub və dağılıb.
Əlverişsiz hava şəraitinin nəticələri digər rayonlara da təsir göstərib. Güclü yağış, daşqın və sel səbəbindən 60 yaşayış məntəqəsi ilə nəqliyyat əlaqəsi kəsilib.
Fövqəladə Hallar Nazirliyinin və yol xidmətlərinin əməkdaşları müvafiq yerlərdə işləri davam etdirirlər.
Davamlı yağışlarla əlaqədar vəziyyətin daha da pisləşə biləcəyinə dair xəbərdarlıq olunub.
